« Universis Christi fidelibus ad quos littere iste pervenerint, Guido, Sancti-Petri-de-Valle, Garnerius, Beate-Marie de Josaphat, abbates Carnotenses, salutem in Domino. Noverit universitas vestra quod, cum verteretur contentio inter viros venerabiles Thomam de Sancto-Dionisio, archidiaconum Pissiacensem, et Guismundum, canonicum Carnotensem, ex una parte, et Jacobum, presbiterum de Maceriis, ex altera, super decima novalium de eadem parrochia, tandem, mediantibus bonis viris, intervenit talis pax et compositio : quod dictus presbyter in grangia canonicorum loci illius prebendariorum, ultra duos modios, ad mensuram Drocensem, quos ibi percipit ab antiquo, inter annonam, ordeum et avenam, percipiet amodo annuatim dimidium modium, medietatem annonam, et medietatem avenam, ad mensuram supradictam. Ipse autem omne jus, si quod habebat aut habere poterat in futurum in decimis novalium quorumcumque de parrochia illa, cujuscumque sint, temporis seu presentis, seu preteriti, seu futuri, cujuscumque sint, manerii, seu vinearum, seu agrorum arabilium, seu cultuum aliorum, omnino et in perpetuum cessit et quitavit dictis canonicis atque ecclesie Carnotensi. Ita etiam quod ipse, si opus fuerit, ad requisitionem predictorum canonicorum, vel eorum qui pro tempore erunt, et secundum consilium et instructionem eorum, quod juste poterit et honeste auxilium, absque sumptibus suis, eis impendet ad predicta novalia vendicanda1. In cujus rei memoriam et testimonium, nos, ad peticionem partium, presentes litteras sigillorum nostrorum fecimus impressionibus communiri. Actum in presentia nostra, anno Domini MºCCºXVIIº, mense julio. »