« Ego Ursio de Melleyo1, dominus Fractivallis, omnibus notum facio quod cum reverendus pater et dominus meus ligius Galterus, Dei gratia, Carnotensis episcopus, post homagium a me sibi factum, per longum tempus et pluries requisisset ut feodum quod ab ipso tenebam, de casamento Carnotensis ecclesie, eidem aperte dicerem et expresse declararem, attendens in corde meo quod, salva fidelitate mea, illud ei non poteram denegare, immo de jure et consuetudine regni Francorum tenebar hoc facere requisitus, mecum sepius deliberavi et ab antiquis hominibus ballivis et fidelibus meis diligenter inquisivi, et scripta antecessorum meorum et mea revolvi et relegere feci, et secundum quod ex premissis omnibus elicere potui, feodum quod ab ipso teneo et antecessores mei ab episcopis Carnotensibus predecessoribus suis tenuerunt, ita declaravi et declaro. In primis igitur dico me tenere ab episcopo Carnotensi, in civitate Carnotensi, quicquid teneo vel alii tenent a me in loco qui dicitur Turris-Nevelonis, ubi fuit domus propria antecessorum meorum, et Furnum-Nevelonis ibidem prope situm, et quicquid juris et justicie habeo in dictis locis et in feodis et censivis que teneo et alii tenent et tenere debent a me in civitate et banleuga Carnotensi. Item medietatem omnium reddituum, justiciarum, feodorum que teneo et a me tenentur in Cambio et cambitoribus, in Moneta et monetariis, in justicia falsariorum et quarumlibet aliarum rerum ad hec omnia pertinentium, hoc addito quod partem illam quam habeo de monetagio teneo totam ab episcopo Carnotensi. Item Mellaium castrum, cum omnibus pertinentiis suis, jure, justicia, feodis et aliis omnibus, excepto pedagio, ad dictum castrum pertinentibus. Item ab eodem episcopo teneo feoda que a me tenent et tenere debent nobiles viri domini de Galardone, de Mestenone, de Bello-Monte, de Lanereyo, de Monte-Lecardi. Item teneo ab eodem episcopo feoda que a me tenent et tenere debent Evrardus de Levevilla, Guillelmus de Carnoto, Guillelmus Aguillon, Odo de Branderon Odo de Brunel, Pollinus de Mellayo, Henricus de Chaverneio, Guillelmus de Berou, Guillelmus de Theovilla, Nevelo de la Guerche, Johannes Ruffus, excepto eo quod a me tenet dictus Johannes apud Novum-Vicum et Lucum-Gaudrici. Teneo et ad eodem episcopo quicquid teneo et a me tenetur de feodo quod dicitur feodum Godechardi, de quo videlicet feodo vavassores habent justiciam suam, ubicumque sita sint. Et forsan plura alia teneo ab episcopo ipso, de quibus ad presens non recolo ; que, si ad memoriam reduxero, quam citius commode potero, eidem vel successoribus suis declarabo. Ne vero, instinctu Dyaboli aut alicujus prava suggestione, jura beatissime Virginis et gloriose genitricis Dei Marie, domine Carnotensis et tocius orbis, possent in posterum, per me aut heredes et successores meos, in aliquo minui aut perverti, in testimonium hujus declarationis seu recognitionis a me, multa et magna deliberatione prehabita, facte, presentem cartam conscribi feci, et sigillo meo manu propria consignavi, rogans karissimum dominum meum, Dei gratia, illustrem Francorum regem, Ludovicum, de cujus regalibus sunt omnia supradicta, quatinus, ad majorem hujus declarationis seu recognitionis firmitatem, robur et munimen, litteras suas patentes hujus rei seriem continentes domino Carnotensi episcopo conferre dignetur, regie majestatis sigilli caractere consignatas2. Actum anno Domini MºCCº vicesimo nono, tercio nonas julii. »