Confirmation par Louis VII des acquisitions ite l'abbaye.

In nomine sancte et individue Trinitatis, amen. Ego Ludovicus Dei gracia Francorum rex et dux Aquitanorum, notum sit omnibus tam futuris quam presentibus, quod pater meus bone memorie rex Ludovicus et regina mater mea Adelaidis magnifice fundaverunt ecclesiam monialium de Monte martirum, quam pro honore Dei et religiosa conversatione sororum ibidem honeste viventium, et pro reverencia fundatorum caram habere et in nullo diminutam esse volumus. In civitate Parisiensi a porta magni pontis et nusquam alibi solebant esse carnifices et vendere suas carnes, ubi predicte moniales domum quamdam habebant propriam que fuit Guerrici cambitoris, eis annuatim valentem triginta libras, aliquando eciam supra, aliquando infra : sed nos regia prudencia communi commodo totius ville dantes operam, plures esse solito carnifices et in pluribus locis carnes posse vendi constituimus, et prefatam domum Guerrici, et alterius domus, quam moniales habebant in vico parvi pontis intra insulam, quamdam partem ad ampliandam viam in manu nostra accepimus, assensu Ade abbatisse, tociusque capituli, et ipsi ecclesie triginta libras in perpetuum habendas assignavimus in Teloneo carnificum, sive unus sive plures habeant Teloneum. Persolventur autem in quatuor terminis ad Natale Domini, ad Pascha, ad festum sancti Joannis et ad festum sancti Dionysii, et in singulis terminis septem libre et decem solidi. — Perinde sciant omnes quod Ada Montis martirum abbatissa emit a Joanne de Milliaco quicquid habebat in villis que dicuntur Mimbervillier et Buxi et Merlanval, terram scilicet et hospites et campartum, et quicquid quocumque modo possidebat uxor sua Bosleria, ex cujus parte illud ei provenerat, et filiabus suis Petronilla, Elisabeth et Richelda, et Adam de Viniaco, de cujus feodo illud erat, libere et sine calumnia possidendum concedentibus. — Innotescat eciam universis sepedictam abbatissam a Bartholomeo de Auvers emisse quicquid ipse apud Mimberviller et Buxei et Merlanval possidebat, quantum ad terram, hospites et campartum, et omnia que ibidem habebat, quod sine calumnia habendum Teonus de Nantolio, de cujus feodo erat, concessit. — Addendum est eciam quod Philippus de sancto Jonio predicte abbatisse et ecclesie Montis martirum vendidit quicquid habebat apud Torphou, et quamcumque terram possidebat circum circa usque ad caminum petrosum, et venditio hec facta est triginta libris. Quod cum recognitum fuisset in presentia nostra Philippus nobis feodum quod in villa habuerat reddidit, de quo ibidem multis presentibus abbatissam revestivimus. Ut autem ecclesia Montis martirum omnes supradictos redditus in perpetuum habeat et quiete et absque calumnia possideat.......... annotari et nostri sigilli auctoritate muniri, insuper nominis nostri caractere confirmari precepimus. — Actum Parisius anno Dominice incarnationis millesimo centesimo quinquagesimo tercio, regni nostri decimo septimo, astantibus in palacio nostro quorum subscripta sunt nomina et signa. — Tunc sine dapifero erat domus nostra. Signum Guidomi buticularii ; S. Matthei constabularii ; S. Matthei camerarii. Data per manum Hugonis cancellarii.