Fondation du prieuré de la Ville Levèque, par Catherine et Marguerite d'Orléans et Anna de Beauvilliers.

Henricus de Gondy, Dei et Sanctæ Sedis apostolicæ gratia Parisiensis episcopus, Domini nostri regis in suis Status et Sanctiori Consiliis Consiliarius, ac Oratorii suæ regiæ majestatis præfectus seu magister, universis præsentes litteras inspecturis, salutem in Domino. — Piis supplicum votis, præsertim divini cultus augmentum concernentibus, libenter annuimus, illaque favoribus prosequimur opportunis. Cum itaque, sicut exhibita nobis pro parte illustrissimarum principum Catharinæ d'Orleans domicellæ de Longueville, et Margaretæ d'Orleans domicellæ d'Etouteville, ac venerandarum admodum et relligiosarum dominæ Mariæ de Beauvillers, humilis abbatissæ abbatiæ et monasterii Montis-martyrum vulgo de Montmartre prope et extra muros Parisienses, ordinis Sancti Benedicti, monialiumque et conventus ejusdem monasterii, clarissimæque dominæ Annæ de Beauvillers, defuncti illustris domini Petri Forget dum viveret equitis, domini temporalis de Fresnes aliorumque locorum, domini nostri Regis in suis status et sanctiori consiliis consiliarii, secretarii financiarum et mandatorum suæ regiæ majestatis, supplicationis series continebat, quod ipsæ devotionis affectu motæ gratias Altissimo omnium bonorum largitori reddere, seque et bona sua eidem prompte animo offerre cupientes, ut ipsarum ex parte cultus augeretur divinus, certum prioratum de novo in pago de Villa-Episcopi prope Parisios, sub invocatione Beatæ Mariæ Virginis gratiæ, ordinis Sancti Benedicti, et a monasterio seu Abbatiæ et conventu Montis-martyrum dependentem, de novo erigi et construi de denariis nomine eleemosinæ et aliunde colligendis curare, favente Altissimo et sub beneplacito et obedientia nostris, proposuisse atque ad hunc finem ipsas domicellas Catharinam et Margaretam d'Orleans et dominam Annam de Beauvilliers, relligiosasque Abbatissam, et conventum Montis-martyrum, super dotatione hujusmodi prioratus, victu et vestitu novitiarum, presbyterorumque et capellanorum ibidem imposterum collocandorum, die secunda præsentium mensis et anni, coram magistri Joanne et Ludovico Le Camus notariis regiis in Castelleto parisiensi, contractum iniisse, quem per nos laudari et confirmari summopere petunt et requirunt. Nos parisiensis Episcopus præfatus, desiderantes ipsas clarissimas Catharinam et Margaretam d'Orleans domicellas de Longueville et d'Etouteville ac dominam Annam de Beauvilliers fundatrices et dotatrices, in tam sancto et laudabili proposito favere et alios ad similia et augmentanda excitare et promovere, visis per nos prædicto contractu donationis, dotationis et fundationis, quo constat ipsas Catharinam et Margaretam d'Orleans donasse et donare donatione perpetua et irrevocabili inter vivos præfatis relligiosis monialibus abbatissæ et conventui monasterii Montis martyrum acceptantibus, domum, horrea, columbaria, hortos, aream et loca muris clausa in dicto contractu designata, sita in pago vulgo dicto la ville Lévesque, per ipsas acquisita de domicella Maria Le Picart vidua defuncti domini de la Grange-Courtin, dum viveret consiliarii regis et libellorum supplicum ejus hospitii magistri ordinarii, prout apparet, contractu desuper confecto coram Ludovico Le Camus et Nicolao Jolly notariis regiis die quarta mensis Augusti anno domini 1612, et aliam domum præcedenti vicinam prout sese habet cum suis dependentiis, in qua ipsæ domicellæ de Longueville et d'Etouteville nunc habitant......, ipsam vero dominam Annam de Beauvilliers pro parte dotationis dicti prioratus utsupra de novo erigendi et construendi donare, constituere et assignare super omnibus et singulis suis bonis mobilibus et immobilibus summam mille ducentarum librarum turonensium redditus annui duobus æqualibus terminis solvendam, incipiendo a die quo celebrabitur in loco designato pro constructione dicti prioratus prima missa, et in eo actualiter manebunt ad minus decem moniales....... Nos eapropter dictum contractum dotationis et donationis, ac omnia et singula in eo contenta, tanquam ad laudem et gloriam Omnipotentis Dei, B. Mariæ semper virginis, omniumque Sanctorum et Sanctarum, divini cultus augmentum, populi ædificationem et devotionem, commodum et utilitatem ecclesiarum et dicti monasterii Montis-martyrum cedentes, auctoritate nostra ordinaria laudavimus, approbavimus, confirmavimus et emologavimus, laudamusque, approbamus, confirmamus et emologamus per præsentes, idque faciendo permisimus eisdem..... in loco designato vel designando prioratum ut supra qualificatum sub nostris auctoritate et obedientia de novo erigi et construi facere et curare, sub clausulis, conditionibus, oneribus et reservationibus in dicto contractu declaratis, ea tamen lege quod dicta domina Anna de Beauvilliers privilegiis et gratiis fundatricibus concedi solitis utetur et fruetur tamdiu quamdiu solutionem hujusmodi redditus annui.... continuabit, et non aliter.......... In quorum confirmationem et testimonium, has præsentes litteras manu nostra obsignatas per Magistrum Joannem Beaudouyn.... curiæ episcopalis parisiensis notarium juratum et episcopatus nostri parisiensis secretarium ordinarium fieri et signari, sigillique nostræ cameræ jussimus et fecimus appensione muniri. Datum Parisiisanno Domini 1613, die 10 mensis Aprilis. — Signatum : H. episcopus Parisiensis. — Et plus bas : De mandato rever. Domini Parisiensis episcopi : J. Beaudouyn.