Charte de l'évêque de Paris approuvant la fondation d'une seconde chapellenie dans la chapelle des Martyrs, par Hermier et sa femme.
- B Copie du xvie siècle sur un cartulaire de quelques feuillets, où se trouve à la suite une charte de l'official de Paris de 1306, sur le même objet.
- a Recueil des chartes de l'abbaye royale de Montmartre, éd. Édouard de Barthélémy, Paris, 1883.
Guillelmus permissione divina Parisiensis episcopus, notum facimus universis tam presentibus quam futuris, quod coram nobis personaliter constituti, Hermerius de Monte-martirum, scutifer illustrissimi regis Francorum, et Katherina ejus uxor, videntes et considerantes Capellaniam Sanctorum Martirum subtus Montem-martirum in honorem sancti Dionysii et aliorum martirum ab antiquo fundatam, propter minus sufficientes redditus tenues et exiles in ipsa Capellania non bene nec honorifice deserviri, quodque ex eis capellanus dicte capellanie non poterat commode sustentari, habentes eamdem magne devotionis affectionem, et volentes propter reverentiam dictorum Sanctorum Martirum divinum officium augmentari, in augmentum reddituum capellani in dicta capellania antiquitus instituti, et ad utilitatem et jus ejusdem capellanie dederunt sex libras parisienses annui et perpetui redditus capiendas in thesauro illustrissimi regis Francorum Parisius annis singulis, terminis infrascriptis : videlicet medietatem , et aliam medietatem super sexdecim libris parisiensibus annui et perpetui redditus amortizatis ex donatione regis quas habuerunt et habent dicti conjuges in thesauro predicto, ut dicebant. — Item asserunt dicti conjuges coram nobis quod ipsi intendentes et proponentes una cum predicta capellania sic ab ipsis ditata et etiam augmentata, in eadem capella unum alium capellanum fundare ibidem cum primo Capellano, ut cultus divinus ibidem solemnius augmentetur ob reverentiam dictorum beati Dionysii, ejus sociorum et aliorum martirum, (concesserunt) viginti libras parisienses quas Philippus illustrissimus rex Francorum nunc regnans dedit et concessit dictis conjugibus annui et perpetui redditus in thesauro suo parisiensi capiendas annis singulis amortizatas, terminis infrascriptis ; scilicet, medietatem et aliam medietatem , quas viginti libras parisienses annui et perpetui redditus eisdem conjugibus datas in thesauro predicto dederunt et in perpetuum concesserunt cuidam Capellano in dicta capella de novo instruendo secundum formam et modum primi Capellani ab antiquo in prima Capellania instituti, et tenebuntur bona fide dicti duo Capellani in dicta capella die qualibet divinum officium celebrare, et in domo construenda a dictis conjugibus personaliter residere ; quam domum dicti conjuges promiserunt bona fide edificare et construere eorum propriis sumptibus et expensis bonam, sufficientem et idoneam. Et voluerunt dicti conjuges quod si contingeret eos velle edificare quamdam domum ultra sufficientiam dictorum capellanorum, quod ipsi aut alter eorum superstes, quamdiu vixerint, possint in eadem habitare et de eadem disponere prout eorum placuerit voluntati, quamdiu vixerint duntaxat. Ita tamen quod dicta domus pro eorum usibus propriis construenda ad ecclesiam monialium de Monte-martirum libere revertatur post decessum ultimi decedentis. — Asserunt etiam quod ipsi dederant et concesserant quamdam partem cujusdam pecie vinee amortizatam que vocatur La Goechière retro capellam predictam, quam habuerant dicti conjuges a religiosis mulieribus abbatissa et conventu monasterii Montis-martirum, in recompensationem cujusdam alterius pecie vinee quam dicti conjuges dudum habebant et possidebant amortizatam ex eorum proprio conquestu in loco qui dicitur La Quarrière, contiguam culture Montis-martirum, quam vineam volunt post edificationem dictarum domorum et post eorum decessum cedere duntaxat in jus edificii dictorum capellanorum, hoc pacto quod dicti conjuges et eorum ultimus superstes possint presentare personam idoneam abbatisse que pro tempore erit, salvo et retento in omnibus abbatissis Montis-martirum, que pro tempore erint, omni jure conferendi vel presentandi dictam capellaniam de novo fundatam secundum modum et formam antique capellanie a dictis abbatissis super jure conferendi vel presentandi antiquam capellaniam hactenus observatas ; salvo etiam predictis mulieribus religiosis abbatissis et conventui omni jure dominii, proprietatis, possessionis, juris, patronatus seu collationis, gardie seu custodie et alterius juris cujuscumque, que seu quas dicte religiose habent seu habere poterant ante fundationem nove capellanie in ipsa capella domoque construenda, cum omnibus pertinentiis ad eamdem. Que premissa fecerunt dicti conjuges ob remedium animarum suarum parentumque suorum et omnium aliorum benefactorum, et specialiter ob remedium anime bone memorie defuncti Philippi regis Francorum qui decessit in Arragonia, Marie quondam ejus uxoris regine, liberorum suorum et Philippi nunc regnantis, et bone memorie defuncte Johanne quondam ejus uxoris ac liberorum suorum. — Et nos predictus G. parisiensis episcopus cupientes divinum officium augmentari, ut ratum in futurum et stabile perseverent, premissa omnia et singula laudamus, confirmamus et etiam approbamus, et nostri interpositione decreti roboramus. In cujus rei testimonium sigillum nostrum proprium presentibus litteris duximus apponendum. Datum et actum .
