Lettre de XL sols de rente sur la maison Roul le Tailleur. Donation d'une rente de XL sols assise sur une maison de Paris.

Universis presentes litteras inspecturis, Officialis curie Parisiensis salutem in Domino. Notum facimus quod coram nobis constituti Simon et Johannes de Altisiodoro fratres et Maria eorum soror, quondam liberi defuncti Simonis de Altisiodoro civis parisiensis, asseruerunt quod dictus Simon, dum vivebat, compos mentis, dedit, concessit et assignavit in puram et perpetuam elemosinam Margarete filie sue, sorori dictorum Johannis, Simonis et Marie, moniali Montis-martirum pro vestitu ejusdem Margarete, quadraginta solidos parisiensium annui redditus percipiendos a dicta Margareta quamdiu vixerit annuatim ad duos terminos, videlicet, viginti solidos in Pascha, et alios viginti solidos in festivitatem sancti Remigii subsequentem, et sic deinceps super quamdam domum suam moventem de hereditate dicti defuncti Simonis, ut dicebant, sitam Parisius in vico qui dicitur Mons presbiterorum, contiguam ex uno latere domui Petri de Sancto Benedicto, et ex altero latere domibus dicti defuncti Simonis facientibus ......... de castello festuce. Voluit et ordinavit insuper dictus Simo, prout idem Simon, Johannes et Maria confessi sunt coram nobis, quod dicti quadraginta solidi parisiensium annui redditus ad opus vestium monialium Montis-martirum convertantur post decessum Margarete supradicte, pro anniversario dicti Simonis et Alesis ejus uxoris in dicta ecclesia annuatim celebrando, percipiendi annis singulis super domum predictam a dictis monialibus seu illis qui ab ipsis causam habebunt ad terminos prenotatos. Prenominati vero Johannes, Simon et Maria dictas donationem, concessionem et assignationem coram nobis laudaverunt, voluerunt et acceptaverunt spontanea voluntate, non coacti, promittentes, fide in manu nostra prestita corporali, quod contra premissa vel aliquod premissorum per se aut per alium non venient in futurum ; immo quod dictos quadraginta solidos parisiensium annui redditus dictis Margarete et monialibus seu illis qui ab ipsis causam habebunt, super domum predictam ad terminos prenotatos liberabunt, garentizabunt et deffendent, quamdiu vixerint, ad usus et consuetudines Francie contra omnes. Promiserunt etiam dicti Simon, Johannes et Maria sub dicta fidei religione quod quam cito Guilbertus et Robinus fratres eorumdem, quondam liberi dicti defuncti Simonis, et adhuc in minore etate constituti, ad etatem legitimam devenerint, quod ipsi procurabunt et facient quod dicti Robinus et Guilbertus omnia et singula premissa, prout sunt expressa coram nobis, volent, acceptabunt pariter et concedent, et de non veniendo contra fidem in manu nostra corporalem prestabunt. In cujus rei testimonium et memoriam ad petitionem dictorum Simonis, Johannis et Marie, sigillum nostrum duximus presentibus apponendum. Datum anno Domini millesimo CC^mo. LX^mo mense Februarii.