Obligation prise par l'abbesse au sujet d'une maison donnée à l'Abbaye.

Universis presentes litteras inspecturis, Petronilla abbatissa humilis ecclesie Montis-martirum eternam in Domino salutem. Notum facimus quod cum Bernardus lemovicensis et Odelina uxor ejus contulissent in elemosinam perpetuam Ysabelli et Adeline, ambabus corumdem (filiabus), monialibus ecclesie nostre, quamdam domum quam habebant Parisius de conquestu suo sitam in vico qui dicitur Charaurri, ita quod ipse filie sue, scilicet domine, fructus sive proventus perciperent et haberent pro suis necessariis toto tempore vite sue, voluissentque quod post decessum earumdem sororum dicta domus ad conventum ecclesie nostre Montis-martirum devolveretur pro vestibus comparandis ex ejusdem domus proventibus ad usus nostrarum monialium, prout hec omnia in litteris bone memorie Petri quondam parisiensis episcopi vidimus contineri. Tandem cum dicta domus esset vendita pro centum libris parisiensium, eo quod dominus censive non permittebat ecclesiam nostram eamdem domum tenere in manu mortua, de pecunia reddita ex venditione predicta, que preterea nobis abbatisse tradita fuit et numerata, ex parte dicti conventus taliter inter nos et conventum ecclesie nostre et dictas filias dictorum Bernardi et Odiline, conventum esset quod ipse centum libre ponerentur in emendatione et refectione, sive reparacione cujusdam furni ecclesie nostre, promittimus per stipulationem solempniter factam nos reddituram annuatim necnon et soluturam de proventibus furni predicti de dicta pecunia, ut dictum est, ad utilitatem perpetuam nostre ecclesie reparati, eisdem Isabelli et Adeline, quamdiu vixerint, vel alteri earum que supervixerit septem libras parisiensium integraliter et viginti solidos conventui ecclesie nostre terminis inferius annotatis, ad festum Sancti Remigii quadraginta solidos, ad Nativitatem Domini quadraginta solidos, ad Pascha totidem, et totidem ad Nativitatem beati Johannis Baptiste. Predictos autem viginti solidos debet percipere et habere conventus noster, quamdiu vixerint predicte filie vel altera earumdem, utraque autem filia de medio sublata cessabit solutio viginti solidorum predictorum, et predicte septem libre ad conventum nostre ecclesie devolventur ab abbatissa que pro tempore fuerit singulis annis in posterum persolvende ad vestes comparandas ad usus ipsarum monialium secundum voluntatem dictorum Bernardi et Odeline ejus uxoris defunctorum, et ad omnes pactiones seu convenciones necnon et ad omnia alia supradicta tenenda et fideliter adimplenda, nos et furnum ipsum et nostrum monasterium sive ecclesiam nostram, illas etiam que in posterum nobis succedent et que post nos venerint, quantum in nobis est specialiter obligamus, et de dicta pecunia solvenda, ut dictum est, terminis supradictis oneramus. Et ut hec in perpetuum rata sint et firma, in testimonium presentes litteras sigilli nostri munimine fecimus roborari. Datum anno Domini millesimo CCº. tricesimo mense Aprili.