Lettres pour les religieuses de Montmartre, contre les maistres et gouverneurs de la grand boucherie de Paris. Acte par lequel les bouchers de Paris reconnaissent avoir emprunté des titres à l'Abbaye.

A tous ceulx qui ces présentes lettres verront, Gabriel baron et seigneur d'Allegre, Sainct Just, Meilleau, Trozet, Sainct Diey, et de Pusol, conseiller chambellain du Roy nostre sire et garde de la prevosté de Paris, salut. Sçavoir fasons que par devant Robert le Riche et Robert Alaire, notaires du Roy nostre dit sire en Chastelet de Paris, furent présens en leurs personnes honnorables hommes Pierre de Ladehors, Adriain de Saratyon1, Pierre de Livres, Claude d'Auvergne, maistres et jurés de la grand boucherie de Paris, maistre Jehan de Saintion laisnè, Jacques de Saintion laisné, Jacques de Saintion le jeune, Nicolas de Saintion, maistre Claude de Saintion, Martin de Saintion, Odo de Saintion, Anceaulme de Saintion, Jehan de Saintion premier moien, maistre de la grand boucherie, maistre Jehan Triault stipullant et soy faisant fort pour Pierre de Saintion ; Charles de Saintion, Anthoine de Saintion et Jehan de Saintion, tous quatre enfans de feu Pierre de Saintion et de damoiselle Jehanne de Rubenpré jadis sa femme et de présent femme dudit Triault, et encore ledit Pierre de Ladehors stipulant et soy faisant fort pour Pierre, Loys et Claude de Ladehors ses filz, ledit maistre Jehan de Saintion laisné stipulant et soy faisant fort pour Jehan de Saintion son filz, et ledit Adrian de Saintion comme procureur de Pierre Thibert, tous maistres de ladite grand boucherie faisant et représentant la plus grand et sainne partye dicelle et eulx faisans et portans fort des aultres maistres de ladite grand boucherie, estans assamblez, convoquez et appellez en la maison et auditoire de la justice de ladite grand boucherie pour et ou nom de la communaulté dicelle, lesquelz esdictz noms, de leurs bons grez, sans contraincte, recongnurent et confessèrent que pour leur profit faire et de ladite communaulté et leur dommaige eschiver, les religieuses abbesse et couvent de Montmartre leur ont aidé de trois lettres desquelles la teneur sensuit : « Ego Guido Francorum regis buticularius ....... (Voy. cette lettre, plus haut, page 131), " — » Ego Ludovicus Dei gratia Francorum rex, ex regie administrationis providentia...... (Voy. cette lettre, p. 89), « — » Philippus Dei gratia Francorum rex. Noverint universi quod cum contentio esset..... (Voy. cette lettre p. 146). « Pour desdites trois lettres dessus transcriptes avoir par lesditz de la grand boucherie les coppies ou vidimus collationnées aux originaulx, lesquels originaulx sont tousjours demourés en la possession desdites religieuses abbesse et couvent de Montmartre, pour par iceulx (ceulx) de la grand boucherie eulx aider en certains procès quil ont oudit Chastelet à l'encontre de Louys Daumont, Jehan Daumont, Jehan de Gien lesné au nom qui procède Guillaume de Gien, Jehan le Maistre, maistre Louys Barré ; desquelles coppies, vidimus, ne originaulx, yceulx de la grand boucherie ont promis, seront tenus, et promettent esditz noms de jamais eulx en aider à l'encontre desdites religieuses abbesse et couvent en quelque manière que ce soit, sur paine de cinq cens livres parisis à applicquer auxdites religieuses abbesse et couvent de Montmartre, et de rendre et payer audit nom tous coustz, frais, missions, salaires, journées, despens, dommaiges et interestz qui faictz et encouruz seraient par deffault des choses dessusdictes ou daucunes dicelles non entretenir et deument accompliz, soubz l'obligation de tous les biens desdictz de la grand boucherie et communaulté esdictz noms, de leurs successeurs, meubles et immeubles présens et advenir, qu'il ont pour ce du tout soubmis et soubmectent en la juridiction et contrainte de ladicte prevosté de Paris et de toutes justices et jurisdictions ou trouvés seront, et renonceront en ce faisant expressément yceulx maistres et communaulté dicelle grand boucherie esdictz noms, à toutes exceptions, déceptions, cavillations, reliefz, impétrations, dispensations, absolutions données et a donner, et à toutes aultres choses générallement quelques que len pourroit faire, alléguer et obtenir contre ces lettres, et pour empescher l'effect, contenu et exécution dicelles, et au droit disant generalle renonciation non valoir. En tesmoing de ce, nous, à la relation desdictz notaires, avons faict mestre le scel de ladicte prévosté de Paris à ces présentes lettres qui furent faictes, passées et accordées le Vendredi neufvième jour de Décembre mil cinq cens et treize.