Lettres patentes de Henri IV, portant confirmation des possessions et privilèges de l'Abbaye.

Henry, par la grace de Dieu roy de France et de Navarre, à tous présens et avenir salut. Receu avons l'humble supplication de noz chères et bien amées dévotes relligieuses, les abbesse et relligieuses du monastère de S. Denys du Mont des Martirs de Montmartre, ordre de Sainct Benoist, contenant que en lan mil cent trente quatre le feu roy Loys auroit, à la requeste et par le conseil de Catherine Adelays royne sa très amée espouze, fait bastir à l'ayde de Dieu ledict monastère, esglise et abbaye en ladicte montaigne, à laquelle esglise et aux sanctimonialles y servans Dieu il auroit donné et octroyé, pour avoir et posséder à jamais, de son bien et domayne, accordant à ce son filz Loys lors ja esleu roy, les villages, maisons, bouticques, terres, vignes, prez, bois, pescheries, moulins, cours d'eaues, fours et autres appartenances et usaiges, avec la justice, vicairie, cens, rentes et autres domaines, le tout libre, paisible et franc de toute exacticn, tailles et coustumes, le tout à plain déclairé et spéciffié par les lettres de chartre de la dottation et fondation de ladicte abbaye ; laquelle fondation et dottation après leur décez auroit esté ratiffiée, accreue et augmentée en biens et domaines par ledit roy Loys leurs filz, es années mil cent quarante deux, mil cent quarante trois, et mil cent cinquante quatre, par ses lettres de chartre, par lesquelles il leur auroit conceddé toutes les choses susdites sy libres et sy paisibles quil ne se seroit reservé rien ny à luy, ny à ses heritiers, ny à homme du monde, à quoy le pappe Innocent en lan mil cent trente-sept, le pappe Lucius en lan mil cent quarente quatre, et le pappe Eugenius en lan mil cent quarente sept, auroient presté consentement selon la pétition que lesdictz deffunctz roy et royne en auroient faict à leurs sainctetez, ayant iceulx pappes confirmé ledict monastère, statuans que l'ordre monastique y seroit à perpétuité gardé et conservé selon la reigle de S. Benoist, voullans que lesdictes sanctimonialles eussent libre puissance d'eslire leur abbesse, et que quelconques possessions et biens, qui y estoient ou seraient donnez pour pieuse dévotion, fussent conservez audict monastère à jamais, dont et de tout ce que dessus, elles auroient tousjours du depuis bien et dheuement jouy et usé, nous requérant humblement, que comme il a pleu à Dieu convertir ceste calamiteuse affliction qui estoit pendant les troubles et guerres dernières, en une paix, repos et tranquillité, nostre plaisir soit les y voulloir maintenir et conserver. Sçavoir faisons, que nous inclinans libérallement à la supplication et requeste desdictes abbesse et relligieuses, desirans non seullement les maintenir et conserver en la dottation et fondation de leurdicte église, monastère et abbaye, ains aussy leur accroistre et augmenter, leur avons de grace spécial, plaine puissance et auctorité royal, confirmé et confirmons ladicte fondation et dottation de ladicte église, monastère et abbaye, avec tous et chacuns leurs villaiges, maisons, terres, prez, vignes, boys, cens, rentes, justice, vicairie, voyries, biens, possessions et droictz quelconques, qui leur ont esté donnez par pieuse donation et de nouveau leur donnons et conceddons, pour par lesdictes abbesse et relligieuses, leurs officiers, receveurs, fermiers, tenanciers, hommes et serviteurs domesticques, en jouyr et user plainement, paisiblement et librement, francs de toutes exactions, tailles et coustumes, et sy libres et sy paisibles que nous ne nous en sommes rien réservé ny à nos héritiers, ny à personne du monde, ainsy qu'il est contenu par lesdites lettres de chartre desdites fondation et dottation, ensuivant lesquelles nous les avons exemptées et les exemptons de toutes tailles, subsides, pontz, portz, péages, passaiges et autres impositions quelzconques qui pourroient estre demandez à leurs dictz officiers, receveurs, fermiers, domestiques, chartiers et chevaulx, quand ilz amennent en ladicte abbaye bledz, vins, boys, bestiaulx, salines, fruictz et autres provisions nécessaires pour la nourriture, vestiaire, et entretènement desdictes abbesse et relligieuses et de leurs ditz serviteurs domesticques, en monstrant aux commis à la levée desditz impostz le certifficat de ladicte abbesse, seellé du sceau de ladicte abbaye, afin qu'il n'en soit abusé, voullans que par leurs officiers et voyers, elles puissent faire tenir leur justice et faire les allignemens des bastimens et ediffices en leurs ditz villaiges, terres, héritaiges et possessions, et qu'elles soient maintenues et conservées en leurs autres droictz de garde gardienne et de Committimus pour leurs causes et procès, le tout ainsy qu'ilz en ont cy-devant bien et deuement jouy et uzé, jouissent et usent encores à présent. Sy donnons en mandement à nos amez et féaulx Conseillers les gens tenans noz Cours de Parlement et des Aydes à Paris, prevost dudict lieu, ou son lieutenant, et à tous noz justiciers et officiers qu'il appartiendra, que noz présentes lettres de confirmation, octroy, don, concession et exemption ilz facent lire et enregistrer, et de tout le contenu es lettres de dottation, fondation, donation de ladicte abbaye, et des présentes, ilz facent, souffrent et laissent jouir et user lesdictes abbesse et relligieuses, ensemble leurs officiers, receveurs, fermiers, fermes et domesticques, plainement et paisiblement, cessant et faisant cesser tous troubles au contraire, etc... Donné à Montraulx ou moys d'Aoust, l'an de grace mil six cens neuf, et de nostre regne le vingt ungnième.

Signé : Henry. — Par le Roy : Signé : Forget.