Lettre faisant mention d'une graingne et aucunes terres estans empres Ste Luce. Admodiation d'une grange et de terres.

Universis presentes litteras inspecturis, nos Petrus et Johannes dicti Choisel, milites, salutem in Domino. Notum facimus quod nos promisimus et creantavimus abbatisse et conventui Montis-martirum, quod nos faciemus Petrum, Hugonem, Ansoldum, Manassey et Alesiam liberos defuncti Philippi de Mota militis, quum ad etatem legitimam pervenerint, quittare penitus et in perpetuum et interpositione fidei, dictis abbatisse et conventui, quandam granchiam sitam apud Sanctam Luciam, et terras ad eamdem granchiam pertinentes, terras videlicet quas defunctus Guido de Bestisiaco avus eorumdem liberorum in vita sua tenuerat ad admodiationem a dictis abbatissa et conventu sub annua pensione duorum modiorum bladi, et trium modiorum avene, et etiam duo arpenta terre sita in loco qui dicitur Clausus-episcopi, que terra vocatur la Vigne. Et si forte dictos liberos quittare omnia supradicta facere non possemus, prout superius est expressum, nos eidem abbatisse et conventui de omnibus damnis, et sumptibus, et de perditis totaliter restaurandis, que contingeret easdem abbatissam et conventum incurrere per liberos ante dictos, occasione predictarum granchie et terrarum, obligavimus et constituimus per litteras nosmetipsos. Datum anno Domini millesimo CCº. XXXº. octavo mense Julii.