Loyer à cens d'une échoppe sous le Châtelet.

Cest la lettre de Girard le Grand gainnier qui tient une eschoppe de nous assize soubz le Chastelet de Paris, à la vie de luy, sa femme et son filz, à vint livres parisis de rente par chascun an.

A tous ceulx qui ces présentes lettres verront, Simon Morhier, chevalier, seigneur de Villiers, conseiller du roy nostre sire et garde de la prévosté de Paris, salut. Savoir faisons que par devant Arnoul Longueville et Jehan Berthélemy, notaires du roy nostre sire, de par luy establis ou Chastelet de Paris, fut présent Girart le Grand gaynier et bouteillier demourant à Paris, lequel de son bon gré, bonne volunté, propre mouvement et certaine science, sans aulcune force ou contrainte, recongnut et confessa avoir prins et retenu à tiltre de cens ou rente anuuelle, des maintenant, durant les vies de luy, de Katherine sa femme et de Jacquet le Grant, leur aisné fils, à présent orfèvre.... des religieuses et honnestes dames les religieuses abbesse et couvent de l'église de Montmartre, une eschoppe contenant cellier, ouvroir par bas et chambre dessus, estant soubz le Chastelet de Paris du costé devers saint Lieffroy, tenant d'une part à une aultre eschoppe que tient a présent Casin la Bote, et d'autre part à une aultre eschoppe, où demeure a présent Henriet Mariavale, pour de tout ce joyr et user par lesdits Girart, Katherine sa femme et Jaquet leur fils, leurs dictes vies durant, et du survivant de chascun d'eulx et de leurs ayans cause. Ceste prinse et retenue faicte tant pour et parmy ce que lesdits Girart, sa femme et fils seront tenus de tenir clos et soustenir ledit lieu bien et deuement durant leurs dites vies, comme et parmy huit livres parisis de rente que sesdits femmes et fils en seront tenus, et luy present devant lesdits notaires gaiga en leurs mains et promist en bonne foy rendre et paier par chascun an... aux quatre termes en lan à Paris généralement accoustumés, premier terme commençant à la S. Remy prochain venant etc...........

En tesmoing de ce, nous, à la relation desdicts notaires, avons mis à ces lettres le seel de ladicte prevosté de Paris, l'an mil quatre cens vint cinq, le Mardi cinquiesme jour du moys de Mars.