Lettres patentes de Louis XIII, portant dotation de 300 livres, en faveur de la chapelle des Martyrs.

Louis, par la grace de Dieu roy de France et de Navarre, à tous présens et à venir salut. Les plus riches ornemens dont les hommes se puissent signaler en ce monde sont les vertus que Dieu nous a proposées comme des degrez pour parvenir et participer à la divinité, lesquelles se trouvant aux personnes desroys sont d'autant plus remarquables que leurs qualitez advantageuses les mettent au dessus des autres. Et de toutes, celle que nous debvons aujourd'huy le plus praticquer et mettre en exercice semble estre la gratitude et recognoissance, laquelle Sa Majesté divine nous prescrivant mesmes envers ceux qu'il nous a soubmiz, nous faict voir que celle des bienfaictz et graces qui viennent de sa bonté doibt estre toute particulière. Ceux que nous recevons journellement de son assistance, outre l'obligation que nous luy avons de nous avoir establis pour commander à tant de peuples, de nous conserver encores et nous combler de tant de grâces, nous doibvent esmouvoir à de nouveaux ressentimens, lesquelz, ne pouvant tesmoigner en l'estat qui nous est commun avec les autres hommes que par des submissions et actions de graces tres affectueuses, aultant que nous sommes esloignez de ses perfections, dans sa bonté ordinaire, il nous a faict cognoistre avoir agréables, comme la foiblesse de nostre nature ne nous permet de nous aprocher de sa grandeur, d'adresser quelques fois noz prières à ceux, lesquelz après avoir conversé en ce monde, et par leurs bienfaictz et souffrances mérité d'estre receus en son paradis, pour porter noz vœux et acquérir de sa divine bonté les choses qui nous seroient nécessaires pour mériter les mesmes graces par la charité qu'il a daigné enseigner et recommander surtout à ses créatures ; c'est pourquoy tant de graces et bienfaictz, et particulièrement celuy du recouvrement de nostre santé après une si dangereuse maladie, nous convient de nouveau à tesmoigner par quelques marques du ressouvenir de l'efficace des intercessions des Sains Martirs que nous avons tousjours eu en particulière vénération et recogneuz favorables médiateurs des graces de Sa Divine Majesté, à seconder les pieux desseings de ceux qui ont naguières faict construire une chapelle au Mont des Martyrs près nostre bonne ville de Paris en l'honneur d'iceux. Ce que ne pouvant mieux faire que par la fondation d'icelle et dotation par chacun an d'une somme capable d'y entretenir ung prestre qui puisse tous les jours vacquer au service divin et y célébrer la Saincte Messe en l'honneur de Dieu soubz l'invocation des Sainctz Martirs — Par ces causes et aultres à ce nous mouvans, avons ce jourd'huy de nostre grâce spécialle, par ces présentes signées de nostre main, fondé et dotté à perpétuité pour nous et noz successeurs roys ladite chapelle nouvellement bastie en l'honneur de Dieu soubz l'invocation desditz sainctz Martirs audit Montmartre, de la somme de trois cens livres doresnavant par chacun an, à commencer du premier jour de Janvier de l'année prochaine, pour l'entretien, comme dict est, d'ung prestre qui vacquera seulement à y célébrer le service divin et Saincte Messe par chacun jour de l'année, à icelle somme de trois cens livres avoir et prendre sur le revenu de notre domaine audict Paris, les anciennes charges préalablement acquittées, laquelle susdicte somme nous voulons estre par chacun an paiée et délivrée comptant à la dame abbesse de l'Eglise et couvent de Montmartre et de ladicte chapelle sur ses simples quittances par le receveur de nostredict domaine audict Paris. Sy donnons en mandement à nos amez et féaux conseillers les gens de nos Comptes à Paris, présidens et trésoriers généraux de France et de noz finances audict lieu, que ces présentes ils facent registrer chacun en droit soy et d'icelle somme de III^e livres jouir et user par les mains des receveurs de nostredict domaine présens et avenir, les procureurs dudict lieu ou administrateurs soubz leurs simples quittances, selon le contenu en ces présentes, voulant que tous ce qui leur aura esté payé et délivré à l'occasion susdicte soit passé et alloué en la despence des Comptes desdictz receveurs par lesdictz gens de noz Comptes, leur mandant ainsy le faire sans difficulté, car tel est nostre plaisir. Et afin que ce soit chose ferme et stable à tousjours, nous avons faict mettre nostre scel à cesdictes présentes. — Donné à Paris, au mois de Décembre, l'an de grâce mil six cens trente, et de nostre regne le vingt uniesme.

Signé : Louis. — Par le roy : De Loménie.