Lettre d'une recognoissance faite de XX sols parisis, à Paris. Donation d'une rente de XXI sols.

Universis presentes litteras inspecturis, Officialis curie parisiensis, salutem in Domino. Notum facimus quod in nostra presencia constituti Petrus de Cauda alutarius et Aalosia uxor ejus cives parisienses asseruerunt, quod ipsi ex eorum proprio conquestu habebant, tenebant et percipiebant annis singulis, quatuor terminis Parisius consuetis, viginti unum solidos parisiensium annui census, incrementi, seu redditus super domo quadam, que quondam fuit defuncti Michaelis dicti Gastesel, sita Parisius ultra Magnum Pontem in vico de Parvis Campis, contigua domui Porci de Bellomonte ex parte una, et domui Ade Ruffi ex altera in censiva Montis-martirum, ut dicebant, quos siquidem viginti unum solidos parisiensium census annui, incrementi seu redditus predictos, et quicquid juris, dominii, proprietatis, possessionis et actionis ipsi habebant in dictis viginti uno solidis census, incrementi, recognoverunt in jure coram nobis se dedisse ex nunc in puram et perpetuam elemosinam donatione facta pure et simpliciter inter vivos, (sine) spe aliqua revocandi donum, domicelle Salesia de Montemirabili, domicelle Petronille dicte Bonefille, et domicelle Sedilie, monialibus Montis-martirum, et alie ipsarum in solidum que supervixerit aliis habendos, levandos et percipiendos a predictis tribus monialibus, et altera ipsarum que supervixerit aliis, super domo predicta, annis singulis, quatuor terminis predictis, ad usus predictarum monialium ; et (post dictarum monialium) decessum dicti viginti unus solidi parisiensium annui census seu redditus ad monasterium Montis-martirum pleno jure et in perpetuum devenient, communicandi in hunc modum, videlicet, medietatem in vestibus monialium Montis-martirum, et aliam medietatem ad usus monasterii et abbatisse Montis-martirum predictorum. Et promiserunt dicti conjuges ex certa scientia, spontanea non coacta voluntate, sua propria fide data in manu nostra, quod contra donationem, concessionem et quitacionem predictas jure aliquo, ratione conquestus, dotis, doarii, donacionis propter nuptias, aut alio jure quocumque communi vel speciali non venient per se vel per alium in futurum, nichil juris sibi vel suis heredibus in eisdem de cetero retinentes, juridictioni etc... se supponentes. Datum anno Domini millesimo CC^mo LXXXº, quinto die veneris ante Nativitatem S.Johannis Baptiste.