Lettres de François I^er, defendant à tous gens de guerre de se loger dans l'abbaye de Montmartre et ses dépendances, etc.

De par le Roy,

A tous noz lieutenans, gouverneurs, mareschaulx, bailliz, seneschaulx, prevostz, capitaines, chefz et conducteurs de noz gens de guerre, tant de noz ordonnances, ban et arrière-ban, que de pied, qui sont ou seront cy-apres à nostre soulde et service, et aux commissaires commis et a commectre, à faire et establir les logeis de nosdictz gens de guerre, ausquelz ces présentes ou vidimus d'icelles faict soubz seel royal seront monstrées et exhibées, salut. Nous vous deffendons très expressément et a chascun de vous, sur tant que craignez a nous desobéyr et encourir nostre indignation, que vous ne aulcun de vous ne logez ne souffrez loger en l'abbaye et monastère de Montmartre les Paris, ne ez maisons, lieux, mestaieries et censes qui en deppendent ; et en icelles ne prenez ou fourraigez, faictes, ne souffrez prendre ou fourraiger aulcuns bleds, vins, chairs, lars, poullailles, foings, avoynes, ne aultres biens ou provisions quelzconques, oultre le gré, voulloir et consentement des relligieuses de ladicte abbaye de Montmartre ou de leurs gens, procureurs, fermiers, mestaiers et censiers et fermiers. Laquelle abbaye, maisons, lieux et mestairies d'icelle, ensemble lesdictes religieuses, leurs dictz gens, procureurs, fermiers, mestaiers et censiers nous avons exemptez et exemptons desdictz logeis, et les avons prins et mys, prenons et mectons quant a ce en et soubz nostre protection et sauvegarde espécial, sçachans ceulx qui feront le contraire de ceste nostre présente sauvegarde et deffense que nous en ferons faire la justice et pugnition si tres estroicte et rigoreuse que les aultres y prendront exemple. Donné à Romorantin soubz nostre seel de secret, le quinziesme jour de Juillet l'an de grace mil cinq cens vingt quattre. — Ainsy signé : Par le Roy, De Neufville, et scellé du seel secret du Roy en placard de cyre rouge.