De pratis nostris juxta Yvetam.

Omnibus presentes litteras inspecturis, Officialis P., ecclesie Parisiensis archidiaconi, salutem in Domino. Notum facimus quod, in nostra presencia constitutus, Egidius dictus de la Ruthoere1, clericus, asseruit quod ipse habebat et possidebat tria arpenta prati, sita prope fontem d'Ivète2, in censiva prioris d'Ivete, movencia de hereditate ipsius clerici, ut dicebat, quorum trium arpentorum prati recognovit idem clericus se dedisse et concessisse in puram et perpetuam elemosinam quintam partem ecclesie Beate Marie de Roscha. Item recognovit dictus clericus coram nobis se vendidisse et in perpetuum quitavisse predicte ecclesie Beate Marie de Roscha quatuor partes dictorum trium arpentorum, pro quatuor viginti libris Parisiensibus jam sibi solutis, traditis et numeratis, ut idem clericus venditor confessus est coram nobis, renuncians exceptioni non numerate pecunie, non tradite, non solute et non numerate. Et promisit idem clericus, fide in manu nostra prestita corporali, quod contra venditionem et quitacionem et donationem predictas, jure hereditario aut alio quocunque modo, per se vel per alium non veniet in futurum et quod predictas quatuor partes dictorum trium arpentorum prati venditas, ut dictum est, predicte ecclesie et illis qui causam habebunt ab eadem ad usus et consuetudines Francie garentizabit et liberabit quocienscunque opus fuerit contra omnes. Promisit etiam, sub prestita fide, quod in dicta quinta parte dictorum trium arpentorum prati per se vel per alium nichil juris in posterum reclamabit ; immo quitavit penitus et expresse ex nunc in posterum dicte ecclesie quicquid juris habebat, vel habere poterat, in eadem quinta parte ; et de recta garendia ferenda predictus clericus se et bona sua universa, ubicumque sint et fuerint, nec non et heredes suos ecclesie predicte obligavit et oneravit et obligatos relinquit. Datum anno Domini Mº CCº quadragesimo nono, mense februario.