Compositio inter nos et milites deStratis.

Ego Symon Lisiardus, ballivus nobilis viri Philippi, regis Francorum filii, comitis Clarimontis. Notum facio omnibus presentes litteras inspecturis, quod cum venerabilis religiosusque P......, abbas Beati Dyonisii in Francia, coram domino Symone de Leviis et me, qui ad hoc de mandato dicti comitis fuimus specialiter destinati, Petrum de Cauli et Arnulfum veterem de Stratis, milites, super quibusdam dampnis et multis aliis querelis traxisset incausam. Tandem, de prudentum virorum consilio, in dominum Reinaudum de Tricoc et Renaudum de Stratis, milites, de omnibus querelis hucusque habitis inter ipsos, salvis omnibus erramentis, compromiserunt : ita videlicet quod quicquid juditio, vel pace, per arbitrium suum proferrent partes tenentur inviolabiliter observare. De isto autem arbitrio firmiter observando dederunt predicti milites fidejussores, videlicet dictus P. de Cauli, Ausondum de Thivereriis, Renaudum et Johannem de Stratis, milites ; Arnulfus vero Renaudum et Johannem de Stratis, milites, et dominum Odonem de Chauferi ; hoc modo videlicet quod si predictus Petrus et Arnulfus, milites, arbitrium a predictis arbitris prelatum observare integraliter nonvellent, dicti fidejussores tamdiu apud Pontem Sancte Maxencie, sive Silvanectis, ubi melius abbas vellet, prisionem tenerent donec dicti milites et arbitrium observarent et dampna et dependita redderent dicto abbati et ecclesie sue, que per ipsos essent assequti. Et ego, de voluntate predicti Symonis de Leviis et partium assensu, presentibus litteris in testimonium sigillum meum apposui. Actum apud Medium Vellare anno Domini MºCCº XXº VIIIº, mense novembri, sabbato proximo post festum sancti Clementis.