Passage a un chevaucheur de l'escuierie1

Charles, par la grace de Dieu roy de France, a tous noz lieuxtenans, connestable, mareschaulx, admiraulx, visamiraulx, seneschaulx, bailliz, prevostz, cappitaines, chastellains, gardes de bonnes villes, citez, chasteaulx, forteresses, bastides, pons, pors, passages, travers, peages, chaucees, jurisdicions, destroiz et autres lieux quelzconques, a tous maires, eschevins, bourgoiz, jurez et habitans de villes, et a tous noz autres officiers, justiciers et subgetz, bienvueillans, amis et alliez de nous et de nostre royaume ausquelz ces presentes seront monstrees, salut et dilection. Comme souventes foiz pour besoignes et affaires qui grandement nous touchent ou les affaires de nostre royaume Tel, chevaucheur de nostre escuierie, soit envoyé de par nous en pluseurs lieux en nostredit royaume et dehors, nous mandons a vous, nos justiciers, officiers et subgez, prions et requerons vous, amis, aliez et bienvueillans, que ledit Tel, lui quatriesme en sa compaignie et au dessoubz, armez ou desarmez, avec leur or, argent, joyaulx, bouges, harnoiz, chevaulx, lettres closes ou patentes et autres biens et choses quelzconques vous laissez, chascun de vous endroit soy, passer, sejourner, demourer et retourner par lesdictes villes, citez, chasteaulx, forteresses, bastides, pons, pors, passages, travers, jurisdicions et destroiz de jour et de nuit, plainement et paisiblement, sanz leur donner ou faire ne souffrir estre fait ou donné en corps ne en biens destourbier ou empeschement aucun ; mais a nostredit chevaucheur pourveez ou faites pourveoir de bon et seur conduit. Et pour plus diligemment faire et acomplir [fol. 79v] nosdictes besoingnes et affaires, lui baillez ou faites bailler et delivrer bonnes et seures gardes, chevaulx et autres neccessitez a ses despens et par pris raisonnable, se mestier en a et il vous requiert, telement que nostre service n'en soit retardé ou empeschié. Saichans, noz justiciers, officiers et subgetz, que, se vous estes trouvez faisans le contraire, il nous en desplaira et vous en ferons punir telement que ce sera exemple a tous autres ; et vous, noz bienvueillans, amis et alliez, en vueilliez tant faire que nous vous en doyons savoir gré et comme en cas pareil vouldriez que feissions faire pour vous ou les vostres en cas semblable ou greigneur. Et pour plus ferme et seure chose, nous avons prins et mis, prenons et mettons d'abondant nostredit chevaucheur avecques sa famille, choses et biens quelzconques en nostre especial sauvegarde. Voulens ces presentes demourer en leur force et vertu jusques a un an prouchain venant. Donné a etc.

[10.1.a]  ¶ Nota qu'on ne baille pas communement ces lettres de passage ainsi amples, sinon aux chevaucheurs qui sont de l'ordonnance de l'escuierie du roy.

[10.1.b] * ¶ Item qu'elles ne durent que un an et que on ne mande pas qu'on leur face provision de gardes et chevaulx, sinon a leurs despens.

[10.1.c] * ¶ Item nota ce mot feissions faire, car mieulx est qu'il y ait feissions faire que qu'il n'y eust seulement feissions ; car le roy de soy ne pourverroit pas de chevaulx, de vivres ne d'autres neccessitez aux chevaucheurs ou autres de ses bienvueillans, mais le feroit faire.