Don de droit de gabelle a un grant seigneur en ses terres

Charles etc., aux commissairesa etc. Comme la gabelle du selb vendu es greniers a sel establiz en diverses parties de nostre royaume ait esté mise suz ou temps passé pour pourveoir au fait de la guerre et il soit ainsi que noz tres chiers et tres amez cousins Telz et Telz ayent souffert et supporté ou temps passé et encores aient a supporter pluseurs grans fraiz et charges a cause dudit fait de la guerre en leurs terres et seigneuries, lesquelles charges ilz ne pourroient supporter ne soustenir sanz avoir l'emolument de la gabelle des greniers et chambres a sel establiz de par nous en aucunes villes estans en leursdictes terres et seigneuries, ainsi qu'ilz nous ont fait remonstrer, savoir vous faisons que nous, ayans regart a ce que dit est et aux autres tres grans charges et affaires que nosdiz cousins ont eu depuis aucun temps ença et ont encores de present a soustenir en maintes autresc manieres, et considerans aussi la prochaineté de lignage en quoy ilz nous attiennent, voulens sur ce leur secourir et aidier a supporter lesdictes charges et pour certaines autres causes et consideracions qui a ce nous ont meu et meuvent, a iceulx noz cousins avons de grace especial et auctorité royal donné et octroyé, donnons et octroyons de grace especial par ces presentes tous les deniers, prouffiz et emolumens de la gabelle de tous les greniers et chambre a sel establiz tant esdiz duchiez de etc. comme es contez de etc., es villes de etc. et en toutes les autres villes et terres appartenans a nosdiz cousins pour ceste presente annee, commençant le premier jour de tel mois et qui finira au derrenier jour de tel mois prouchain venant, pour iceulx deniers, prouffiz et emolumens de ladicte gabelle prendre et parcevoir par nosdiz cousins par les mains des grenetiers ou commis esdiz lieux establiz pour les convertir et employer ou fait de la guerre. Si vous mandons et estroictement enjoingnons que par lesdiz grenetiers desdiz greniers et chambres a sel estans es païs et lieux dessusdiz et autres quelzconques appartenans a iceulx noz cousins vous leur faites bailler et delivrer, ou au tresorier general de nosdiz cousins pour eulx, touz les deniers, prouffiz et emolument [fol. 142] de la gabelle de tous iceulx greniers et chambres a sel pour cestedicte presente annee, commançant et finissant comme dessus est dit. Et par rapportant ces presentes ou vidimus d'icelles, fait soubz seel royal, avecques quittance de nosdiz cousins ou de leursdiz tresoriers tant seulement, nous voulons et mandons tout ce qui baillié et delivré aura esté a la cause dessusdicte estre alloué es comptes desdiz grenetiers ou d'autres qui paiez les auront et rabatuz de leur recepte partout ou il appartendra sanz aucun contredit ou difficulté. Non obstans quelzconques autres dons, pensions ou bienffaiz par nous autreffoiz faiz a nosdiz cousins non exprimez en ces presentes, ordonnances, mandemens etc. Donnéd.