Remission a cause du joyeux advenement1

Charles etc. Savoir faisons a tous presens et a venir que, comme a nostre premier joyeux advenement a la couronne es villes, citez et autres lieux de nostre royaume nous de nostre auctorité royal puissions et ayons acoustumé delivrer et mettre hors de prisons, s'il nous plaist, tous prisonniers, clers et laiz, en quelzconques prisons, tant des juges seculiers comme d'Eglise, pour quelzconques cas qu'ilz soient prisonniers, prins et detenuz, tant criminelz comme civilz, et leur remettre, quitter et pardonner a plain, a tousjours et a jamais tous les faiz poura quoy ils sont prins et detenuz, avecques toutes peines corporelles, criminelles et civiles qu'ilz peuent ou doyent pour ce estre encouruz, et de ceste auctorité et droit royal ayent usé de tout temps plainement noz predecesseurs roys de France, et nous soions nouvellement venuz en tel lieu, ou oncques mais n'avions esté mesmement depuis que nous sommes parvenuz a la couronne et dignité royal, es prisons duquel lieu estoit tenu Tel pour tel cas etc., et soit declairé au long, lequel nous, en usant de nostre droit dessusdit, avons fait delivrer et mettre hors desdictes prisons, et le fait et cas dessus declairé lui avons quittié, remis et pardonné et par ces presentes de grace especial et auctorité royal quittons, remettons et pardonnons, avec toute peine, offense et amende corporelle, criminelle et civile, en quoy il est etc., le seurplus comme en une autre remission.