Povoir a requerir secours et aide de gens1

Karolus etc, universis etc. Confidenter amicicias contrahunt et ad auxilia vocant qui libenter amicis auxiliari studuerunt. Sane cum de affectione ad nos sincera dilectissimi consanguinei nostri marcionisa Montisferrati nullatenus dubitemus, ejus cum fiducia et amicicie firmioris ligam querimus et postulamus auxilium. Cum igitur estivo tempore in hostes super nos irruentes bellicas acies disponamus, ad presenciam ejusdem consanguinei nostri dilectos et fideles nostros etc. duximus destinandos. Dantes eisdem potestatem et speciale mandatum contrahendi amicicias et federa cum eodem consanguineo nostro pro nobis et nomine nostro ultra sanguinis affinitatem qua nobis attinet modo et forma meliori quibus eis videbitur expedire ; necnon exortandi et requirendi pro parte nostra eundem consanguineum nostrum super auxilio prestando nobis cum armata manu et expedita brevitate ad repulsionem hostium predictorum et defensionem regni nostri ; ac super predicto auxilio, egressu a patria et ingressu ad regnum nostrum ductu, loco et tempore ac numero armatorum et balistiariorumb atque stipendio tractandi, concordandi et promittendi pro nobis et nomine nostro et ad premissa nos et nostra obligandi, prout videbitur expedire. Promittentes bona fide nos ratum habituros quicquid super predictis amiciciis et auxilio tractatum, promissum et pactum, firmatum et obligatum fuerit atque sine fraude expleturos ac nostras litteras certifficatorias dare, si opus sit, cum fuerimus requisiti. In quorum etc.