Commission a soy informer sur modificacion de feux

Charles etc., a tel bailly etc. A la supplicacion de noz bien amez les gens des trois estaz de tel lieu, disans que, tant par les guerres et mortalitez comme autres fortunes, pluseurs lieux et parroisses desdictes prevostez sont telement apovriz et diminuez de gens et de chevance que ilz ne pourroient plus paier ne supporter les charges sur eulx imposees a si grant nombre de feux comme ilz sont imposez et assiz, et a ceste cause s'en sont pluseurs habitans alez et de jour en jour s'en vont demourer autre part, telement que lesdiz N. sont en voie de demourer inhabitees, se par nous n'est sur ce pourveu de remede convenable, nous, ce consideré, vous mandons et, pour ce que lesdiz habitans sont assiz en vostre bailliage et que vous estes nostre plus prouchain juge et qui pourrez mieulx entendre et savoir [fol. 132] la verité de la besoingne, commettons, se mestier est, que, appellez avec vous nostre procureur et autres notables personnes teles que verrés estre propices, en nombre competant, vous vous informez bien et deuement sur ce que dit est, et l'informacion que faicte en aurez avec voz advis renvoyez par devers noz amez et feaulx gens de noz comptes feablement close et seellee pour, icelle veue, proceder a la diminucion et moderacion desdiz feux ou autrement pourveoir sur ce ausdiz supplians comme ilz verront estre a faire. Car nous leur en avons donné et donnons povoir et mandement especial. Non obstans quelzconques ordonnances, mandemens ou defenses a ce contraires. Donné etc.