Nominacion pour université1

Karolus, regis Francorum filius, regnum regens, Dalphinus Viennensis etc., reverendissimis in Christo patribus dilectis et fidelibus consiliariis nostris archiepiscopis Turonensi et Bitturicensi necnon reverendis in Christo patribus et nobis dilectissimis singulis episcopis, abbatibus, abbatissis, collegiis et capitulis aliisque personis ecclesiasticis quibus spectat beneficiorum ecclesiasticorum, secularium et eciam regularium, collacio seu quevis alia disposicio in antedictis ac Burdegalensi et Senonensi provinciis, et eorum seu earum cuilibet, salutem in Eo a quo omne datum optimum et omne donum perfectum de sursum est. Regalem nostramque decet solicitudinem ut, que fidei robur [fol. 73v] et augmentum orthodoxeque religionis decus conspiciunt, devoto prosequamur favore totisque desideriis aspicemus, quatinus Ecclesia Christi super firmam petram solidetur ac, validis suorum defensa propugnaculis, nos et catholicam plebem ad celestem qua tendimus Ecclesiam triumphantem deducat. Hoc zelo ducti nostri predecessores et igne caritatis succensi animo pervigili studuerunt in regni quibusdam civitatibus preclaris studia litterarum stabiliri, quibus viri sublimes et eruditi nutrirentur, utilitati publice fideique incrementoa fructum suis ex laboribus afferentes. His ecclesiastica jure debentur beneficiab a Deo sibi collatum donum sanctissime condicioni in aliorum salutem directionemque redundet et suis salutiferis laboribus debitum fructum ab altari dominico metiantur. Hec inter alias multas prestantissima racio regiam magestatem amonuit ut ecclesiam galicanam ad suas antiquas veletc reduci libertates et ut juris communis disposicione servata merita curiosius agnoscerentur personarum et benemeritorum virtutes virorum beneficiorum commoditatibus aptarentur. Cum igitur dilectissimi nobis rector, doctores et universitas studii Andegavensis exponi fecerunt desolati sui studii propter guerrarum longa discrimina deflendam dispersionem suppositorumque et studencium paupertatem, dampnum hujusmodi animo dolenti referimus, scientes quoniam, marcescentibus litterarum doctrinis, arestent et fructus boni operis. Considerato igitur quod studiorum duracioni studenciumque vite ac sustentacioni consulendum sit, ad vos preces nostras duximus convertendas. Novimus etenim ante reductionem Ecclesie ad libertates antedictas per formam rotulorum ipsis studiis esse provisum hancque rerum seriem laudabiliter esse jam lapsis temporibus observata ut, ordine dato pariter et suscepto, confusio non sequatur. Nos autem, qui inter curas ejus regencie quam gerimus ad ea mentem convertimus que publice prosperitatis conferunt atque afferunt incrementa, predictis consideratis et dicte universitatis precibus inclinati, vos et vestrum quemlibet rogamur et obtestamur in Domino per eam quam professi estis Ecclesie fideique stabilitatem venerendissimumque decorem quatinus attencione premissorum ad Deum et rectitudinem largicionis vestre convertentes occulos ut ad devotionibus vestris plene speramus eisdem rectori, doctoribus et suppositis ipsius universitatis providere velitis de beneficiis ecclesiasticis juxta formam rotuli cujusdam nobis ex parte dicte universitatis presentati ; de cujus tenore in quantum vestrum quemlibet tangit per alias nostras patentes litteras particularibus suppositis dicte [fol. 74] universitati concessas si opus sit certifficari poteritis ; sic agentes ut ad Ecclesiam ejusque cultum et vestri officii debitum vester apud Deum et homines manifestetur affectus et nostre preces affectuose quas pro equitate fundimus sortiantur effectum, neque partiali affectione vestra inclinentur desideria ut litteratos et prestantissimos viros studiorum aliis postponatis in predicte constitucionis spretum pariter et fracturam. Nolumus autem nominacionibus et requestis per nos factis pro nostris et consortis nostre officiariis et servitoribus per has presentes aliquod prejudicium generari. Quia vero pluribus personis et ad diversas dioceses presentes nostre littere diriguntur, volumus et mandamus quatinus litteris de vidimus sub sigillo regio aut alio autentiquo factis fides adhibeatur velud originali. Datum etc.