Lettre pour avoir ses gaiges ja soit ce qu'on soit absent

Charles etc., a nostre amé N., par nous commis a faire la poursuite et paiement des gaiges des gens de nostre parlement a Poictiers, salut et dilection. Comme nostre amé et feal conseiller oudit parlement maistre H. Lopier1 soit parti de ladicte ville de Poictiers des le mois de novembre derrain passé pour aler en ambaxade [fol. 145] par devers nostre saint pere le pape, pour choses touchans le bien de nous et de l'eglise de nostre royaume et du Daulphiné et aussi de ladicte court de parlement, et en ladicte ambaxade lui conviengne faire grant despense et maintenir honnorable estat, ce qu'il ne pourroit pas bonnement supporter sanz avoir ses gaiges dudit office de nostre conseiller oudit parlement, ainsi qu'il nous a fait remonstrer, pour ce est il que nous, ce consideré et autres causes a ce nous mouvans, voulons et ordonnons que tant que ledit maistre Henry sera et demourra en ladicte ambaxade, il ait et preigne sesdiz gaiges de nostre conseiller oudit parlement a commencier du jour qu'il parti de Poictiers tout ainsi comme s'il estoit resident en icelui parlement. Si vous mandons et enjoingnons que d'iceulx gaiges vous lui faites compte et paiement selon nostre presente voulenté et ordonnance. Et par rapportant ces presentes et quittance suffisant sur ce tant seulement, tout ce que lui en aurez paié sera alloué en voz comptes et rabatu de vostre recepte par noz amez etc. Ausquelz etc. Non obstant que ledit maistre H. soit absent dudit parlement comme dit est et quelzconques ordonnances, mandemens ou defenses a ce contraires. Donné a etc.