Quittance ou rabaiz a habitans sur leur part d'une ville

Charles etc., a noz amez et feaulx conseillers les commissaires par nous ordonnez sur le fait et gouvernement de l'aide a nous derrenierement octroyé en tel lieu pour le recouvrement de nostre seigneurie et le reboutement de noz ennemis, salut et dilection. Savoir vous faisons que nous, considerans la diminucion et depopulacion en quoy noz amez les manans et habitans de nostre ville de M. sont encouruz par les grans mortalitez qui ont esté en ladicte ville et les grans charges, pertes et dommages qu'ilz ont souffert et seuffrent pour le fait et occasion des guerres et des gens d'armes qui ont sejourné oudit païs, consideré aussi la grant loyauté et obeïssance que tousjours avons trouvee en eulx et la grant despense qu'il leur a convenu et convient faire etc., a icelles gens etc. avons pour ces causes et autres a ce nous mouvans donné et quittié et par ces presentes de grace especial donnons et quittons sur ce qu'ilz nous peuent devoir a cause dudit aide [fol. 144] la somme de tant, pour icelle employer a la garde et defense dudit païs et resister a nosdiz ennemis qui y font guerre. Si voulons et vous mandons expressement que par N., receveur particulier dudit aide en A. 1, vous faites deduire et rabatre ausdiz telz ladicte somme detant et les en tenir quittes et paisibles, en leur faisant rendre leurs biens qui pour ce sont ou seroient prins, arrestez ou empeschiez. Et par rapportant ces presentes et recongnoissance suffisant nous voulons ce qui rabatu et quittié leur en aura esté jusques a ladicte somme de tant estre alloué es comptes et rabatu de la recepte dudit N. par noz amez etc. ; ausquelz etc. Non obstans quelzconques assignacions faictes ou a faire sur ladicte recepte, quea ladicte somme ne soit pas levee par descharge du receveur general dudit aide comme il est acoustumé de faire, et quelzconques ordonnances etc. Donné etc.