Retenue d'onneur

Par le roy
Maistres de nostre hostel et vous, maistre et contreroleur de nostre chambre aux deniers, savoir vous faisons que, pour le bon rapport qui fait nous a esté de la suffisance, industrie, loyaulté et diligence de N. et pour consideracion des bons services qu'il nous a faiz ou fait des guerres, fait de jour en jour et esperons qu'il nous face ou temps a venir, icellui avons retenu et retenons par ces presentes en tel office, pour nous y servir d'ores en avant, aux honneurs, droiz, prouffiz et emolumens acoustumez. Si vous mandons et a chascun de vous, si comme a lui appartendra, que, prins et receu dudit Tel le serement acoustumé, vous nostre presente retenue faites enregistrer es registres, papiers et escripz de nostredicte chambre aux deniers en la forme accoustumee, et dudit office ensemble desdiz droiz, prouffiz et emolumens faites, souffrez et laissiez ledit N. joïr et user paisiblement. Donné etc.

[8.2.a]  ¶ Combien que souventes foiz aucuns ne demandent retenue d'aucun office que pour honneur, toutesvoyes, quant ce sont gens qui les valent, on les fait souvent aprés intervale de temps servir en ordonnance. Et pour ce n'est pas bon de trop user de ceste retenue cy, qui est simple d'onneur, mais a gens de bien on leur peut faire la retenue precedent ceste et se attendre de l'ordonnance de servir a ceulx a qui il appartient.