Tauxacion de voyage

Charles etc., aux generaulx etc. Comme presentement nous envoions N. par devers nostre tres chier etc., ou : en tel païs pour tele cause, vel : pour aucunes choses touchans le bien de nous et de [fol. 138v] nostre seigneurie, et a ceste cause conviengne audit N. faire grosse mise et despense, laquelle il ne pourroit pas supporter de ses gaiges et bienffaiz ordinaires, pour ce est il que nous, ce consideré et la grant chierté de vivres qui est a present oudit païs, et afin aussi que ledit N. maintiengne plus honneste et honnorable estat oudit voyage vel : en ladicte ambaxade, a icelui avons tauxé et ordonné, tauxons et ordonnons par ces presentes la somme de tant pour chascun jour qu'il vacquera oudit voyage, dont nous voulons et lui octroions qu'il soit creu par son serement ou par sa cedule affirmative sur ce sanz autre enseignement, a icelle somme prendre et avoir des deniers desdictes finances. Si vous mandons et enjoingnons que par nostre amé et feal G. Ch., receveur general d'icelles finances1, vous faites faire compte et paiement audit N. de tout le temps qu'il affermera avoir vacqué oudit voyage. Et par rapportant ces presentes et quittance sur ce dudit N. portant ladicte certifficacion affirmative par serement tant seulement, tout ce qui compté et paié lui en aura esté sera alloué es comptes etc. par noz amez etc.  ; ausquelz etc. Non obstans les gaiges que ledit N. prent ordinairement de nous, autres tauxacions, dons ou bienffaiz cy non exprimez et quelzconques ordonnances etc. Donné etc.

[14.13.a] ¶ Nota que en teles tauxacions on doit mettre qu'on lui face faire compte et paiement, car il n'y a pas somme desinee2 sinon par jour ; et aussi y doit on mettre que tout ce qu'on lui aura compté et paié soit alloué etc. Mais se la tauxacion se faisoit par une somme totale du voyage, on y pourroit ainsi mettre a iceluiN. avons tauxé et ordonné, tauxons et ordonnons par ces presentes la somme de N , a la prendre et avoir pour une foiz des deniers desdictes finances. Si vous mandons et enjoingnons que par G., receveur general d'icelles finances, vous des deniers de sa recepte faites bailler et delivrer audit N. ladicte somme de N  ; laquelle, par rapportant ces presentes et quittance dudit N. seulement, sera alloueeetc.