Commission a abatre menues forteresses

Charles etc., a nostre amé et feal conseiller Tela. Comme etc., nous vous mandons, commandons et expressement enjoingnons et commettons que toutes manieres de forteresses, soient villes, chasteaulx, eglises, maisons fortes ou quelzconques autres edifices estans en tel bailliage et es ressors et exempcions d'icelui, qui vous sembleront estre a demolir pour le bien et seurté desdiz païs vous faites, viguereusement et sanz aucun depport et toutes faveurs rejectees et arriere mises, abatre et demolir tantost et sanz delay par tele maniere que aucun inconvenient ou dommage ne s'en puisse ou doye ensuir, par deffault de ce, a nous ne ausdiz païs, en faisant toutesvoies premierement crier et publier et par commandement expres que chascun retraie blez, vins, lars et toutes manieres de vivres es bonnes villes fermees et chasteaulx tenables plus prouchains des lieux ou ilz demourront dedanz leb VIII e jour aprés les criz et commandemens a eulx sur ce faiz, sur peine de perdre lesdiz biens ; et ou cas que ainsi ne le feront, prenez ou faites prendre lesdiz vivres et les distribuez par les garnisons de gens d'armes et de trait estans en la frontiere d'ilec entour, pour garder et demourer esdictes places tenables, ou autrement pourveez sur ce le plus convenablement que faire se pourra, pour le bien de nous et du païs. Car de ce faire vous donnons povoir, auctorité et mandement especial. Mandons et commandons etc. que a vous et a voz commis etc. et prestent etc. Donné etc.