Autre commission

Charles etc., a tous etc. Savoir faisons que, pour la bonne relacion qui faicte nous a esté de la personne de N., nous l'avons commis et donné et par ces presentes commettons et ordonnons a aler querir et acheter ou païs d'Alemaigne, de Savoye et ailleurs des chevaulx poura nous et pour nostre escuierie. Si mandons a tous bailliz, seneschaulx, prevostz, chastellains, cappitaines, bourgois et habitans de bonnes villes, chasteaulx, forteresses, pons, pors, passages, travers et destroiz et autres justiciers, officiers et subgetz, prions et requerons les amis, alliez et bienvueillans de nous et de nostre royaume que ledit N. et ses varlez et serviteurs, portans ces lettres, seuffrent et laissent passer, repasser et admener par devers nous lesdiz chevaulx, paisiblement et franchement, sanz y mettre ou donner ne souffrir estre miz ou donné aucun arrest, desplaisir ou empeschement en quelque maniere que ce soit ; ainçoiz leur donnent aide et confort, se mestier est et il les en requiert. Donné etc.