Congié de clorre une ville

Charles etc. Savoir faisons a tous presens et a venir nous avoir oÿe l'umble supplicacion des consulz, manans et habitans de la ville, chastellenie et mandement du Crot1, contenant que ledit lieu du Crot est assis en clef de païs marchissant a l'entree d'Auvergne, de Guienne, de Combraille et de la Marche, et a ceste cause est plus foulee et dommagee par les gens d'armes et autres, passans, sejournans et rapassans par lesdiz païs ; et pour ce lesdiz supplians, afin d'y garder et sauver eulx et leurs biens, ont propos et entencion de faire clorre ladicte ville du Crot, qui est a ce faire avantageuse, se sur ce il nous plaisoit leur octroyer noz congié et licence, si comme ilz dient, en nous humblement requerant que, attendu que les seigneurs ou dames moyens soubz nous de ladicte ville sont d'accord que icelle ville soit close et que ce sera le proufit desdiz habitans et aussi de nous et la seurté du païs d'environ, nous leur vueillons sur ce pourveoir de nostre grace. Pour ce est il que nous, consideré ce que dit est, a iceulx supplians avons ou cas dessusdit donné et octroyé, donnons et octroyons de grace especial, plaine puissance et auctorité royal par ces presentes congié et licence de clorre et faire clorre et fortiffier de murs, tours, foussez, portes et autres choses ladicte ville du Crot, pourveu aussi toutesvoies que ce ne nous tourne a dommage ou prejudice ne au païs d'environ et que, non obstant ladicte fortifficacion, lesdiz supplians facent le guet ou chastel dudit lieu du Crot ou autre part ou ilz sont tenus ainsi qu'ilz [fol. 40v] ont acoustumé. Si donnons en mandement par ces mesmes presentes au seneschal d'Auvergne et a tous noz autres justiciers ou a leurs lieuxtenans presens et a venir et a chascun d'eulx, si comme a lui appartendra, que, se, appellez des nobles et autres gens en ce congnoissans et aussi les autres qui feront a appeller, il leur appert de ce que dit est, ilz facent, seuffrent et laissent lesdiz supplians joïr et user plainement et paisiblement de nostre presente grace, congié et licence, sanz sur ce leur donner ne souffrir estre fait ou donné aucun destourbier ou empeschement au contraire. Non obstans quelzconques ordonnances, mandemens ou defenses a ce contraires. Et afin que ce soit chose ferme et estable a tousjours, nous avons fait mettre nostre seel a ces presentes. Sauf en autres choses nostre droit et l'autrui en toutes. Donné etc.