Executoire sur collacion de benefices1

Karolus, Dei gracia Francorum rex, baillivo N. etc. Cum nos canonicatum et prebendam, quos in tali ecclesia nuper obtinere solebat M., vaccantes ad presens per ipsius obitum vel alias ex aliqua predictarum causarum, quorum canonicatus et prebende collacio ad nos pleno jure vel jure regalie ut supra noscitur pertinere, per nostras alias litteras Tali contulisse dicamur, prout in eisdem lacius continetur, vobis committendo mandamus quatinus dictas litteras nostras decano et capitulo dicte ecclesie presentetis, eisdem requirentes et nichilominus ex parte nostra precipientes quatinus dictum N. vel ejus procuratorem pro ipso in canonicum dicte ecclesie recipiant et in fratrem, eidem stallum in choro et locum in capitulo assignantes, et in dictorum canonicatus et prebende possessionem admittant et inducant eumdem sibique de fructibus, emolumentis, proventibus, obvencionibus et juribus eorumdem faciant integraliter responderi, juxta nostrarum predictarum litterarum de quibus liquebit seriem et tenorem, ipsos ad hoc, si opus sit, [fol. 74v] per capcionem et expletacionem temporalitatis sue viriliter et debite compellendo, nisi ipsi aut eorum aliquis in contrarium se opponant ; quo casu, cum de jure collacionis beneficiorum nostrorum vel : de jure regalie nostre ad nos vel curiam nostri parlamenti cognicio spectare videtur vel noscatur, opponentes hujusmodi ad certam et competentem diem ordinariam vel extraordinariam nostri presentis parlamenti, non obstante quod sedeat, vel futuri proximo Parisius parlamenti adjornetis vel faciatis adjornari, in dicta opposicionis causa processuros et facturos ulterius quod fuerit racionis, dilectas et fideles gentes nostrum dictum parlamentum tenentes vel que nostrum dictum futurum parlamentum tenebunt certifficando super hoc competenter ; quibus mandamus ut super hoc, auditis partibus, exhibeant debite justicie complementum quod eidem Tali de gracia speciali concedimus. Litteris surrepticiis ad hoc contrariis non obstantibus quibuscumque. Datum etc.