Souffrance de bailler denombrement seulement

Charles etc., a noz amez et feaulx gens de noz comptes et a noz seneschal, procureur et receveur ordinaire en Auvergne ou a leurs lieuxtenans, salut et dilection. Oÿe l'umble supplicacion de nostre amé Tel, contenant que puis nagaires il nous a faiz les foy et hommage que tenua nous estoit faire a cause de son hostel, terre et seigneurie de tel lieu et de leur appartenance, a lui nouvellement escheuz par le trespas de feu Tel son pere, mais, obstant la continuele occuppacion qu'il a en nostre service, tele qu'il ne peut vacquer a savoir et enquerir la vraye valeur et declaracion desdiz hostel etc. et aussi obstant ce que les pluseurs qui en tiennent de lui en fief ne lui ont pas encores baillié par escript le denombrement ou adveu desdictes choses ce qu'ilz en tiennent, icelui suppliant ne nous sauroit ne pourroit encores bailler par escript le denombrement ou adveu desdictes choses, si comme il dit, requerant sur ce nostre provision, nous, ce consideré et autres causes a ce nous mouvans, audit suppliant avons donné et octroyé, donnons et octroyons de grace especial par ces presentes terme, souffrance et delay de nous bailler ledit denombrement ou adveu jusques a un an a compter du jour de la date de ces presentes, pourveu toutesvoyes qu'il face et paie les autres droiz et devoirs, se aucuns en sont pour ce deuz et faiz et paiez ne les a. Si vous mandons et enjoingnons et a chascun de vous, si comme a lui appartendra, que ledit suppliant vous faites, souffrez et laissiez joïr et user paisiblement et plainement de [fol. 22v] nostre presente grace, souffrance et delay, en lui mettant ou faisant mettre a plaine delivrance sondit hostel, terres et appartenance, se pour ce estoient prins, empeschiez ou miz en nostre main. Car ainsi nous plaist que soit fait. Non obstans quelzconques ordonnances, mandemens ou defenses a ce contraires. Donné etc.

[4.5.a] * ¶ Nota que, comme devant est dit, la lettre de l'ommage doit estre portee en la chambre des comptes et y doit demourer jusques on y ait baillié son denombrement et les lettres de respit de le baillier doivent estre expediees par la chambre des comptes et y certiffie l'en au dos des lettres de respit que l'ommage est fait et seellé et qu'il est retenu ; et qui veult baillier son denombrement, il en fault faire deux tous pareilz, dont l'un est retenu en la chambre des comptes, l'autre est baillié a la partie avecques son hommage et l'expedicion de la chambre ; et se le baillant est baron, chevalier ou autre qui ait armes congneues, on reçoit bien son denombrement soubz son seel. Et s'il est autre, il le doit faire soubz seel autentique.