Autre clause de relievement quant on est hors du temps deu

Et en oultre, combien que ledit appel soit interjecté de tel jour, neantmoins, obstant une griefve maladie en quoy ledit appellant a esté detenu par long temps jusques a esperance de mort, et aussi les grans perilz qui ont depuis esté sur les chemins a l'occasion des guerres et par le fait de noz ennemis qui y ont couru et fait pluseurs prinses et envahies tant que on n'osoit bonnement venir du lieu ou il demeure par devers nous sanz grant dangier et du corps et des biens, icelui suppliant n'a peu plus tost obtenir ces presentes ne faire au seurplus la diligence de relever et executer sondit appel et sont les trois mois sur ce introduiz passez de tant de jours, par quoy sondit appel est et seroit desert et ledit appellant encourroit grant dommage et perdicion, [fol. 29v] se nostre grace ne lui estoit sur ce eslargie, si comme il dit, requerant icelle. Pour ce est il que nous, qui ne voulons ledit appellant estre decheu dudit appel et de son bon droit a cele occasion, icelui appellant avons ou cas dessusdit relevé et relevons par ces presentes de grace especial dudit temps contre lui encouru depuis lesdiz trois mois ; et lui avons octroyé et octroyons de plus ample grace que de cy a un mois prouchain venant il puist faire executer ces presentes et relever sondit appel aussi vallablement comme s'il l'eust fait dedens le temps deu, non obstant rigueur de stile a ce contraire, en certiffiant suffisamment etc. Ausquels etc. comme ou precedant adjournement.

[5.3.a] ¶ Note bien que, quant on veult obtenir relievement de laps de temps, il fault declairer de combien, comme tu peuz veoir en ce present relievement, ou il est declairé le jour de l'appel et de combien les trois mois sont passez, car le roy n'a point acoustumé de relever sanz savoir de quoy et de combien ; ainsi ne suffiroit pas de mettre seulement que les trois mois feussent passez sanz savoir de combien.