Lettre pour estre exempt de venir a une armee

Charles etc., a tel seneschal etc. et a tous noz autres justiciers et officiers ou a leurs lieuxtenans, salut. De la partie de nostre amé Tel nous a esté exposé que, comme il soit nobles homs et tiengne noblement en fief et arriere fief et par ce soit tenu de nous venir servir en ceste presente armee a l'encontre de noz ennemis et adversaires, ainsi que l'avons mandé et fait publier par maniere d'arriere ban, neantmoins il n'y est peu ne pourroit venir, obstant la continuelle occupacion qu'il a a cause de tele chose, ainsi que ledit exposant nous a fait informer, requerant sur ce nostre grace et exempcion. Pour ce est il que nous, consideré ce que dit est, icelui exposant, en la faveur et contemplacion de nostredit chancelier1 et pour consideracion des bons services qu'il a faiz a feu nostre tres chier seigneur et pere, cui Dieu pardoint, et a nous aussi, avons exempté et quittié et par ces presentes de grace especial et auctorité royal quittons et exemptons de nous venir servir ne envoyer autre pour lui par deça en ceste presente armee et entreprise ne aussi es autres voyages et chevauchees que ferons et ferons faire cy en arriere tant qu'il aura ledit office, sanz ce qu'il lui tourne a aucun blasme, reprouche ou dommage ores ne ou temps a venir. Si vous mandons et enjoingnons et a chascun de vous, si comme a lui appartendra, que ledit exposant vous faites, souffrez et laissiez joïr et user paisiblement de noz presentes grace, exempcion et octroy, sanz lui faire ou donner ne souffrir estre fait ou donné aucun empeschement ou desplaisir au contraire ; ainçoiz, [fol. 111] se pour cause de non estre venu ou avoir envoyé a nostredit mandement et service aucunes de ses terres, fiefz, possessions ou autres biens quelzconques sont ou estoient prinses, saisies ou empeschiees, mettez les ou faites mettre sanz delay a plaine delivrance. Car tel est nostre plaisir. Non obstans quelzconques publicacions sur ce faictes et a faire et autres ordonnances, mandemens etc. Donné etc.

[11.37.a] ¶ Nota que on n'a pas accoustumé d'exempter ung homme de venir servir en armes, fors pour une foiz et pour une armee seulement, et encores selon la neccessité que on a ; et selon les excusacions ou la faculté des parties, on met aucune foiz ceste provision : Pourveu toutesvoies que ledit Tel envoyera pour lui a nostredit service et armee ung homme d'armes monté, habillé et accompaignié souffisamment. Toutesvoies a gens povres et decrepitez on le donne bien aucune fois a tousjours.