Office de tabellionnage1

Karolus, Dei gracia Francorum rex, dilecto nostro Tali, clerico talis diocesis, salutem. Rei publice expediens, ymo necessarium reputantes ut actus et contractus legitimi publica manu ad cautelam presencium et futurorum memoriam conscribantur, tibi, de cujus fidelitate et industria a fide dignis laudabile testimonium perhibetur, tabellionatus seu publici notariatus officium ad quod, prout a fide dignis accepimus, existis ydoneus per te in terra que jure scripto regitur exercendum auctoritate regia tenore presentium concedimus, [fol. 53] recepto a te sub forma que sequitur juramento :
Ego, Talis predictus,juroquod ero fidelis domino nostro Karolo, Dei gracia Francorum regi illustrissimo, heredibusque suis Francorum regibus. Personama, honorem, statum et jura ipsius et regni sui, in his que ad meum officium spectant, pro posse meo diligenter et fideliter observabo et, si quid in contrarium attemptari vel machinari cognoscerem vel sentirem, illud per me vel alium toto posse meo impediam et, si impedire non possem, sibi quam cicius potero revelabo, vel tali per quem poterit ad ejus noticiam pervenire, et consilium quod michi per se vel litteras aut nuntium manifestaverit ad ejus dampnum vel periculum nulli pendam. Secreta eciam curiarum et officiariorum suorum ad que vocatus fuero nemini revelabo cui non debeam revelare. Contractus legitimos, processus, acta judiciaria et alia que de jure mei officii exercebo in prothocollis sine morosa dilacione fideliter reddigam et, postquam redacta fuerint, instrumenta super his maliciose conficere non differam, sed partibus et aliis quorum intererit pro justo et moderato salario, servatis statutis regiis, fraude, dolo et malicia quibuscumque cessantibus, exibebo. Super nullo contractu in quo sciam vim vel metum intercedere aut juribus regiis quomodolibet prejudicari aut alias, clam vel palam, recipiam vel faciam instrumenta. Prothocolla seu libros notularum et registra ad cautelam et securitatem rei publice et memoriam futurorum fidelitate solicita conservabo et ea sine licencia regia aut baillivi vel senescalli de senescallia aut baillivia in qua moram traham non extraham, sed ea, cum officio cessero vel illud deserero, in testamento seu ultima voluntate mea senescallo, baillivo seu judici mandabo vel faciam assignari, salvo jure meo et heredis mei in lucro quod ex eis juxta ordinacionem regiam possit sequi. Et alias dictum officium in locis michi commissis diligenter et fideliter exercebo. Sic me Deus adjuvet et hec sancta.
In cujus rei testimonium, sigillum nostrum presentibus litteris duximus apponendum. Datum etc.