Commission pour imposer un aide1

Charles etc., a noz amez et feaulx conseillers le prieur de La Selle2, maistre Guillaume Le Tur3, Guillaume Charrier4, le seneschal d'Auvergne5, le sire de Croy6 et Aguiot Coustave7, Gonin Rolant8 et Pierre de Nesson9, esleuz ou païs d'Auvergne sur le fait des aides, salut et dilection. Comme par nostre ordonnance pluseurs prelas, barons et gens de bonnes villes de nostre obeïssance de Languedoïl soient presentement venuz en grant nombre en nostre ville de Poictiers, faisans et representans les gens des trois estas de nostredicte obeïssance de Languedoïl, ausquelz en presence de nostre tres chier et tres amee mere la royne de Secile, de nos tres chiers et tres amez cousins le conte de Clermont, le connestable, les contes de Foix, d'Estampes, dea Vendosme, de Harecourt, le sire de Lebret, le conte de Comminge10 et pluseurs autres de nostre sang et lignage pour ce assemblez, nous ayons bien au long fait dire, exposer et remonstrer les tres grans affaires que avons a supporter par necessité tant pour resister a noz anciens adversaires et ennemis les Anglois comme pour la prosecucion de la paix et reunion et reconsiliacion d'aucuns de nostre sang et autres noz subgez envers nous, a quoy avons ferme esperance de parvenir, Dieux aidant, par le moyen de nostre tres chier et tres amé frere le duc de Bretaigne11, [fol. 146] avecques lequel avons nagaires convenu etc., esperans aussi par ce et a l'aide de noz autres parens etc. de debouter nosdiz ennemis et recouvrer etc., ce que ne povons faire sanz grans finances etc., en requerans a nosdiz parens presens et ausdiz gens des trois estaz representans etc. la somme de tant pour la conduite de ces choses etc., lesquelz aprés la deliberacion eue sur ce entr'eulx, saichans veritablement les affaires et neccessitez dessusdictes estre telz que dit est, voulans ainsi que tousjours ont fait aidier etc. en demonstrant leur bonne et vraie voulenté etc., nous ont bien et liberalment octroyé ladicte somme de tant estre levee et cueillie sur eulx par toutes voyes et manieres possibles, dont avons esté d'eulx tres contens, pour lesquelles voyes adviser ont esté assemblez lesdictes gens des trois estaz etc. et sur ce aient esté pluseurs oppinions et voyes pourparlees et a nous rapportees pour en ordonner a nostre plaisir, savoir vous faisons que, eue sur ce grant et meure deliberacion avecques nosdiz parens et pluseurs de nostre grant conseil et autres notables personnes des gens d'Eglise, nous de nostre auctorité royal et plaine puissance avons ordonné et ordonnons par ces presentes que deb ladicte somme de tant sera deduit, ainsi que requis a esté par lesdictes gens des bonnes villes, tant livres tournois pour la porcion des gens d'Eglise et que sur toutes manieres de gens laiz de Languedoïl, officiers ou autres quelzconques privilegiez et non privilegiez sera miz suz, imposé, cueilly et levé la somme de tant, excepté toutesvoyes nobles vivans noblement, suivans et frequentans la guerre, vrais escoliers estans et continuans l'estude sanz fraude et povres mendians, a paier icelle somme a trois termes etc., et que a ce paier soient contrains comme etc., non obstans opposicions ou appellacions, non obstans quelzconques privileges etc., sanz prejudice d'iceulx et sanz ce qu'il leur tourne a prejudice pour le temps a venir etc. Et pour la porcion de ladicte somme avons imposé les manans et habitans en tel païs, estans en tele election, a la somme de tant. Si vous mandons et commettons par ces presentes et enjoingnons expressement que, ces lettres veues, toutesc excusacions cessans et autres choses arrieres mises, vous ledit aide mettez suz sanz delay, en imposant sur les parroissiens desdiz païs et election ladicte somme de tant le plus justement et egalment [fol. 146 v] que faire pourrez, le fort portant le foible, avecques tele somme moderee que verrez estre a faire pour les fraiz, en tele maniere que icelle somme puist venir enz franchement et sanz diminucion. Et a paier icelui aide au receveur sur ce par nous ordonné contraingnez ou faites contraindre tous ceulx qui pour ce feront a contraindre par toutes les voyes et manieres qu'il est acoustumé de faire pour noz propres debtes, non obstans quelzconques opposicions ou appellacions, en faisant au seurplus en cas d'opposicion aux parties oÿes raison et justice. De ce faire vous donnons povoir, mandons et commandons a tous noz justiciers, officiers et subgetz que a vous et a voz commis et depputez en ce faisans obeïssent et entendent diligemment et vous prestent et donnent conseil, confort, aide et prisons, se mestier en avez et par vous requis en sont. Donné etc.