Benefice d'inventoire

Charles etc., a tous ceulz qui ces presentes lettres verront, salut. Exposé nous a Tel que, ja soit ce que N. soit puis un an ença alé de vie a trespassement, delaissié ledit exposant son parant plus prouchain et habille a lui succeder en tous les biens meubles et heritages demourez de son decés, neantmoins il ne s'est osé ne oseroit porter simplement pour heritier dudit deffunct, doubtant qu'il ne fust trop chargié de debtes, par quoy les biens demourez du decés d'icelui defunct sont en voye d'aler a gast et tourner a perdicion, se par nous n'estoit sur ce pourveu de remede convenable, si comme ledit exposant dit, requerant icelui. Pour ce est il que nous, ces choses considerees, audit suppliant oudit cas avons octroyé et octroyons de grace especial par ces presentes que par benefice d'inventoire deuement fait par noz gens et officiers il se puisse porter pour heritier dudit defunct et prendre et apprehender la possession et saisine des biens tant meubles comme heritages demourez de son decés, sanz ce que pour quelzconques debtes, charges ou obligacions d'icelui defunct il soit tenu de paier aucune chose a quelque personne que ce soit oultre la valeur que lesdiz biens monteront par ledit inventoire ; pourveu toutesvoyes que il sera tenu de bailler caucion suffisant, de paier les debtes, obseques et funerailles et de acomplir le testament dudit defunct, s'aucun en a fait, jusques a la valeur desdiz biens dudit inventoire et aussi que, se aucun du lignage se appert qui de lui simplement se vueille porter pour heritier, il y sera receu. Si donnons en mandement par ces presentes a tel bailly et a tous noz autres justiciers ou a leurs lieuxtenans et a chascun d'eulx, si comme a lui appartendra, que, ledit inventoire fait et ladicte caucion baillee, ilz delivrent ou facent delivrer audit exposant lesdiz biens meubles et immeubles demourez par le decés dudit defunct, en le faisant, souffrant et laissant joïr et user d'iceulx selon la teneur de nostre presente grace, sanz l'empescher ne souffrir estre empeschié en quelque maniere que ce soit au contraire. Car ainsi nous plaist il estre fait. Non obstans usage, stille, coustume et quelzconques lettres surreptices a ce contraires. En tesmoing de ce nous avons etc. Donné etc.

[11.15.a] ¶ Nota qu'il fault declairer le temps de la mort du trespassé, car on n'a pas acoustumé de donner lettre de benefice d'inventoire [fol. 99v] sinon dedanz l'an de la mort, qui ne le feroit d'une especiale grace avec reliefvement.

[11.15.b] * ¶ Item nota que l'inventoire des biens se doit faire par les officiers du roy et non par autres.

[11.15.c] * ¶ Item nota qu'il n'y ait autre du lignage qui se voulsist porter pour heritier simplement, c'est a dire sanz benefice d'inventoire.

[11.15.d] * ¶ Item nota que celui qui se fait heritier doit bailler caucion d'autant que valent les biens du mort et qu'il est tenu de paier les debtes et les obseques et aussi d'acomplir le testament, tant que les biens le peuent fournir. Aussi il ne seroit point tenu a en paier plus, ce qu'il seroit se il se portoit heritier sanz benefice d'inventoire.

[11.15.e] * ¶ Item nota que l'executoire s'en adrece aux officiers du roy et qu'on leur mande que la caucion soit baillee et l'inventoire fait avant qu'ilz baillent nulz des biens du mort.

[11.15.f] * ¶ Item nota que celui qui prent le benefice d'inventoire doit estre le plus prouchain heritier, au moins qui s'en vueille entremettre.