Commission de chevaucheur1

Charles etc., a tous noz connestable, mareschaulx, admiral, visadmiral, senechaulx, bailliz, prevostz, cappitaines de gens d'armes, chastellains, gardes de bonnes villes, citez, chasteaulx, forteresses, bastides, pons, pors, passages, travers, peages, chaucees, jurisdicions, destroiz et autres lieux quelzconques, a tous maires, eschevins, bourgoiz, jurez et habitans de villes et a tous autres justiciers, officiers et subgetz, amis, alliez et bienvueillansa de nous et de nostre royaume, ausquelz ces presentes seront monstrees, salut et dilection. Comme souventes foiz, pour grandes besongnes et affaires qui grandement nous touchent, nous envoions en pluseurs et divers lieux de nostre royaume nostre amé Tel, chevaucheur de nostre escuierie, mandons a vous, noz justiciers, officiers et subgetz, prions et requerons vous, amis, alliez et bienvueillans dessusdiz, et chascun de vous si comme a lui appartendra, que nostredit chevaucheur, lui IIII^e en sa compaignie ou au dessoubz, armez ou desarmez, a cheval ou a pié, avecques leur or, argent, joyaulx, males, bouges, harnoiz et chevaulx, monteures, lettres closes et patentes et autres biens et choses quelzconques, vous faites, souffrez et laissez aler, venir, passer, rapasser, sejourner, demourer et retourner par lesdictes villes, chasteaulx, forteresses, pons, pors, passages, travers, peages, coustumes, chaucees, jurisdicions, destroiz et autres lieux quelzconques tans par eaue que par terre, de jour et de nuit, paisiblement [fol. 130v] et plainement, sanz leur faire en corps ne en biens aucun destourbier ou empeschement ; ainçoiz pourveez ou faites pourveoir nostredit chevaucheur de bon et seur conduit, se mestier en a et il vous en requiert. Et pour plus diligemment faire et acomplir nosdictes besoignes et affaires, lui baillez et delivrez ou faites bailler et delivrer guides, chevaux et autres monteures, quant par lui en serez requis, en paiant pris raisonnable pour le loyer d'iceulx chevaulx, guides et monteures. Et tant en faites, chascun de vous endroit soy, que aucun deffault ou inconvenient ne s'en ensuive et que nostre service n'en soit aucunement retardé ; car se vous, noz justiciers, officiers et subgez, estiez trouvez faisans ou avoir fait le contraire et il viengne a nostre congnoissance, nous vous en ferons telement punir que ce sera exemple a tous autres ; et vous, les bienvueillans, amis et alliez de nous et de nostre royaume, en faites tant que vous en doyons savoir gré et que vouldriez que feissions en cas pareil pour les vostres. Et pour plus ferme et seure chose, nous avons prins et miz, prenons et mettons nostredit chevaucheur avec sa famille et biens quelzconques en nostre protection et sauvegarde especial par ces presentes. Lesquelles nous voulons estre et demourer en leur force et vertu jusques a un an. Donné etc.