Recompensacion de perte faicte en avaluacion d'or

Charles etc., aux generaulx etc. Comme des le mois de juillet derrenierement passé nous avons fait prendre et acheter de N. des draps d'or et d'argent pour la somme de tant d' escuz d'or, tant pour nous comme pour donner a Telz et a Telz, et d'icelle somme ait esté faicte avaluacion a monnoye courant au feur de tant solz pour escu, qui estoit environ tant livres tournois, dont lui fut faicte assignacion sur les finances dudit païs de Languedoc, et il soit ainsi que d'icelle somme de tant de livres tournois ledit N. n'ait encores esté parpayé1 et si est l'or depuis telement enchery que, au temps que le paiement lui fut fait, de ce qu'il en a receu escu d'or valoit ja tant solz tournois et de plus en plus se encherist de jour en jour, et ainsi ledit N., tant en ce qu'il en a receu comme en ce qui reste a en recevoir, a esté et seroit perdant de la somme de tant de livres et plus, se par nous ne lui estoit sur ce pourveu de nostre grace et remede, ainsi qu'il nous a fait remonstrer, requerant iceulx, savoir vous faisons que nous, consideré ce que dit est, non voulens que ledit N. soit perdant en sesdiz drapz qu'il nous a liberalment delivrez a creance, a icelui pour le recompenser aucunement de ladicte perte avons ordonné et ordonnons par ces presentes prendre et avoir pour une foiz ladicte somme de tant des deniers [fol. 143] et finances d'icelui païs de Languedoc, ordinaires ou extraordinaires, et icelle somme lui avons donnee et donnons de grace especial, se mestier est. Si vous mandons et enjoingnons que par nostre amé et feal F., receveur general desdictes finances, vous faites bailler et delivrer audit N. ou a son certain commandement ladicte somme de tant. Et par rapportant ces presentes et quittance suffisant sur ce d'icelui N. tant seulement, icelle somme sera allouee es comptes dudit F. et rabatue de sa recepte par noz amez etc.  ; ausquelz etc. Non obstans ordonnances etc. Donné etc.