[Chronique 1407-1424]1
L'an mil CCCC et sept fut le grant yver et furent rompuz le Pont Neuf de Paris, qui estoit de pierre, et le Petit Pont, et aussi une partie du Grant Pont.
Celle annee, la veille de Saint Clement, fut tué a Paris le duc d'Orleans Loys, frere germain du roy.
L'an mil CCCC VIII fut la bataille du Liege de Jehan duc de Bourgongne et de l'evesque du Liege contre les Liejois.
Celle annee trespassa madame d'Orleans, la femme dudit feu duc Loys d'Orleans.
Item le roy party de Paris pour aler a Tours et au retour en mars fut fait le traictié de Chartres sur la mort dudit feu duc d'Orleans entre Charles duc d'Orleans, les contes de Vertus et d'Angolesme, ses enfans, et le duc de Bourgongne Jehan.
Mil CCCC et IX. Montagu, le grant maistre d'ostel du roy, fut decapité a Paris.
Mil CCCC X. Jehan, premier duc de Berry, le duc et les enfans d'Orleans, le duc de Bourbon, le conte d'Alençon, le conte d'Armaignac et le conte de Richemont et autres furent a grant compaignie a Vicestre2 ; depuis poursuirent le duc de Bourgongne jusques a Mondidier, puis s'en retournerent a Saint Denis et a Saint Cloud pres Paris, et fut la bataille de Saint Cloud.
Mil CCCC et XI. Le siege fut miz a Estampes par Loys duc de Guienne, daulphin de Viennoiz, et par le duc de Bourgongne et les gens du roy ; et furent prins le conte de la Marche et autres au Puiset en Beausse par ceulx de la partie d'Orleans.
Mil CCCCa et XII. Le siege fut miz devant Bourges et le traictié d'Aucerre fut fait aprés en aoust.
[fol. 201v] Item celle annee, pou aprés le partement dudit siege, vindrent au secours des seigneurs dessus nommez de la part d'Orleans le duc de Clarence, frere ainsné du roy d'Engleterre3, et grant nombre d'Anglois, et s'en retournerent pour ce que le traictié fut fait ; et a leur retour emmenerent en gaige de partie de leurs gaiges le conte d'Angolesme, frere dudit duc d'Orleans.
Mil CCCC et XIII. Les seigneurs de la partie d'Orleans retournerent a Paris et furent delivrez messeigneurs de Bar et de Baviere et autres grans seigneurs qui estoient prisonniers a Paris en grant dangier. Et fist le roy de la conté d'Alençon duchié, a la requeste des seigneurs, et fut fait le conte duc ; incontinent aprés ladicte entree s'en ala de Paris le duc de Bourgongne hastivement, et celle annee reunit a puissance de gens a Saint Denis et son avant garde fut jusques au Marchié aux pourceaulx delez Paris4, et a son retour laissa garnison a Compiengne, a Soissons, a Bapaumes et Arras.
Celle annee, la veille de Pasques fleuries, le roy et les seigneurs de la partie d'Orleans partirent de Paris pour aler ou voiage d'Arras.
Mil CCCC XIIII. Le roy mist le siege devant Compiegne et fut prise la ville de Soissons d'assault, et fut piteuse chose ; depuis on ala devant Bapaumes et devant Arras, et fut fait le traictié d'Arras.
Mil CCCC et XV. Henry roy d'Engleterre descendit en ce royaume en Caux, mist le siege devant Harefleu et le prist, puis en s'en retournant par la Picardie fut combatu a Agincourt vers Amiens ; et perdirent les François la journee et l'appella on la grant bataille de Picardie, et y moururent les ducs de Braban Philippe, les devant ducz nomez d'Alençon et de Bar, le conteb de Nevers, le connetable d'Albretc, et y furent priz les ducz d'Orleans et de Bourbon, les contes de Vendosme, d'Eu et autres etc.
[fol. 202] Celle annee mourut environ Noël Loys, mon seigneur duc de Guienne, le XXVe de decembre5.
Mil CCCC et XVI. Environ la Saint Jehan Baptiste6 mourut le devantdit Jehan, premier duc de Berry, oncle du roy Charles VIe lors regnant.
Item celle annee7 mourut a Compiengne mon seigneur le daulphin Jehan, qui avoit espousé la fille au duc de Hollande.
Mil CCCC XVII, mon seigneur le daulphin Charles, seul filz du roy, fut a Rouen pour la rebellion.
Celle annee fut le duc de Bourgongne a L'Ourme Hodon devant Paris8, de la devant Saint Cloud et Corbeil, et de la s'en ala a Chartres et de Chartres devers la royne de France Ysabel, qui estoit a Mairemoustier pres de Tours.
Item celle annee le roy d'Engleterre descendi pour la seconde foiz en Normandie devant Touque et le prist, et puis ala mettre le siege devant la ville de Caen et la prist d'assault.
CCCC XVIII. Ledit daulphin Charles, seul filz du roy, party de Paris XIXe de may et y fut la grant murtrerie a l'entree des Bourgongnonsd etc.
Celle annee en yver le siege fut devant Tours et fut faicte la prise d'Azay, et se nomma regent le royaume ledit Charles daulphin, lequel paravant n'avoit pris le nom que de lieutenant general du roy son pere.
Mil CCCC XIX. Furente prinses les treves entre mon seigneur le daulphin et ceulx de l'autre part, et aprés fut fait le traictié de Poilly le Fort.
Celle annee fut tué a Montereau ou foult d'Yonne le dessusdit [fol. 202v] Jehan duc de Bourgongne, et lui succeda son filz Phelipe.
Celle annee le daulphin ala ou païs de Languedoc et le recouvra. Celle annee fut prins le duc de Bretaigne par le conte de Peinthevre et par ses freres.
Mil CCCC XX. Fut faicte l'aliance entre le roy d'Engleterre Henry et le duc de Bourgongne Phelipe, filz du dessusdit Jehan, et fut marié a Trois en Champaigne le dessusdit roy d'Engleterre a madame Katherine, fille du roy. De la vint mettre le siege a Sens, a Montereau et Meleun, puis s'en repassa en Angleterre et y mena sa femme et y ot son premier filz, qui fut nommé Henry comme le pere.
Celle annee les premiers Escoz descendirent, c'est assavoir les contes de Wicthon et de Boucchan9.
La veille de Pasques ou l'en compta IIIIC XXI, fut la bataille de Baugé en Anjou, ou mourut le duc de Clarence, frere ainsné du roy d'Engleterre, et y furent prins les contes Hotinton10 et de […]f et les deux anfans de Beaufort11, filz de la femme dudit feu duc de Clarence et les autres Anglois.
Oudit an IIIIC XXI, fut le voyage de Galardon. En celle annee fut Dreux rendu, et aprés fut le voyage de Vendosme, et de la vint le roy d'Engleterre par Baugency et aprés ala a Villeneufve le Roy, et en octobre fut miz le siege devant Meaulx.
Mil CCCC XXII. Mourut ledit roy d'Engleterre Henry, le premier jour d'aoust12.
Celle annee fut la journee de Cosne sur Loyre.
Celle annee mourut le dessusdit roy Charles de France VIe, le XXIIIe d'octobre13, et lui succeda ledit mon seigneur Charles son filz, qui estoit daulphin et regent.
[fol. 203]g Mil CCCC XXIII. Le daulphin Loys, premier filz du roy Charles dessusdit VIIe regnant a present, fut né en l'ostel archiepiscopal de Bourges, le IIIe jour de juillet, environ III ou IIII heures aprés midi14, et fut nommé Loys en remembrance de saint Louys et de […]15.
Celle annee fut la journee de Cravant et celle de La Gravelle en la basse marche d'Anjou, ou fut prins Lapoule16, Anglois, et ses gens desconfiz, et aussi celle de La Boissiere en Beaujolois, ou fut prins le mareschal de Bourgongne.
Mil CCCC XXIIII. Jeudi XVIIe d'aoust, fut la journee de Vernueil ou Perche des François contre les Anglois, et y moururent les contes de Bouchan, connestable de France, et de Douglas, Escossoiz, et le conte d'Aubmalle aussi, et y fut pris prisonnier le duc d'Alençon.
Celle annee, Artus conte de Richemont, frere ainsné du duc de Bretaigne et mary de la suer au duc de Bourgongne Jehan, paravant femme de feu Loys duc de Guienne, daulphin de Viennoiz, fut fait connestable.
