École des chartes » ELEC » Cartulaires d'Île-de-France » Sainte-Croix d'Orléans » Cartulaire » La Charité, [28 mars 1171 à 15 avril 1172]

Louis VII confirme le don fait par l'évêque d'Orléans au chapitre de 15 livres de revenu sur les oblations au jour anniversaire de la reine Constance et au sien.

  • A Original. Arch. dép. Loiret G 2571.
  • B Bibl. nat. de France, Baluze 78, p. 66.
  • a Achery, Spicilegium, tome VIII, p. 197.
  • b Cartulaire de Sainte-Croix d'Orléans (814-1300), éd. Eugène Jarry et Joseph Thillier, Paris, 1906.
D'après b.

In nomine sanctæ et individuæ Trinitatis amen. Ludovicus, Dei gratia Francorum rex, omnibus in perpetuum. Regiæ sublimitatis nostræ deposcit officium ut nos, qui in solio regni Francorum munere divino residemus, amore Dei de ecclesiis sub nostra potestate constitutis solliciti simus, et si qua personis divino mancipatis servicio beneficia conferantur, maxime illis quas karitatis ac familiaritatis brachiis arcius amplexamur benignum præbeamus assensum, et ne processu temporum perturbari aut in irritum duci valeant pietatis intuitu caveamus. Notum itaque facimus universis tam futuris quam præsentibus quod fidelis ac naturalis noster vir venerabilis Manasses, ecclesiæ Aurelianensis episcopus, canonicis suis, videlicet capitulo Sanctæ Crucis, annuum redditum quindecim librarum in oblationibus magni altaris et calicis in elemosinam perpetuam donavit ; certos etiam terminos, quibus singulis annis reciperentur, assignans, statuit et decrevit ut de illis quindecim libris semper in die anniversarii nostri sexaginta solidi, et in die anniversarii uxoris nostræ, Constanciæ reginæ, quæ in eadem ecclesia consecrationis suæ benedictionem accepit, quadraginta solidi canonicis illis qui servitio intererunt persolventur. Primus terminus decem librarum est ab Isti sunt dies, quando incipit passio Domini, donec integre reddantur. Secundus terminus centum solidorum est, a crastina die exaltationis Sanctæ Crucis, donec integre reddantur. Nos igitur a fideli nostro episcopo requisiti et rogati, cum apud Karitatem essemus, præsentibus fidelibus nostris comite Blesensi Theobaldo, et Petro fratre nostro, et ceteris, peticioni ejus, quæ nobis rationabilis videbatur, condescendimus, et rem totam, sicut ab ipso facta est, amore Dei et intuiti devocionis quam erga nos ipsum capitulum habere dinoscitur concedimus, et præsentis scripti patrocinio confirmamus. Quod ut ratum deinceps permaneat et inconvulsum, scripto commendari et sigilli nostri auctoritate communiri præcepimus. Actum publice apud Karitatem Astantibus in palacio nostro quorum subscripta sunt nomina et signa. S. comitis T. dapiferi. S. Guidonis buticularii. S. Mathæi camerarii. S. Radulfi constabularii.

Data per manum Hugonis cancellarii 1.


1 Scellé sur lacs de soie jaune sur double queue. Le sceau manque.

1 (Monogramme)