A touz cels qui verront ces presentes letres Dreue Pelerin, garde de la prevoste d'Orliens, salut. Sachent tuit que Guill[aulme] Boiau, escuier, a reconneu pardavant nos en dreit que, en tant comme apartient et poait apartenir a lui, il a chevi as chapellins vicaires en l'eglise d'Orliens d'une meson que il ont achetee assise en la rue Maillet, laquele meson fut au baillif de la porte Parisie d'Orliens, assise ou fye dudit Guill[aulme], a ce que il tiengnent et pourseent a touz jourz mes la dite meson, en baillant vicaire toutes faiz que il convendra, a seixante solz de par[ises], desquels LX s. li diz Guill[aulme] se tint a paie pardavant nos a deniers saies nombrez, et renoinca a ce que il ne poist james dire que la dite some de deniers ne li eust este nombrée, baillée et livrée. Et fut devisé que, se mon seigneur l'evesque d'Orliens ensigoit ou menoit mau ledit Guill. ou ses heirs, ladite chevisance seroit nule, mes li diz Guil. ou ses heirs leur rendreit les LX s. davant diz, et n'en seroit li diz Guill. ne ses heirs en plus tenuz et si auroit ces letres quant les LX s. sereint renduz. El quant a ladite chevisance tenir et garder doudit Guill. et de ses heirs, en tant comme apartenoit et puet apartenir a lui et a ses heirs, et de non venir encontre par aucun dreit ne par aucune cause ou reson en la maniere que il est desus dit, li diz Guill. a obligé aus chapelains davant diz et a leur successeurs et a cils qui auront cause d'aux, et souzmis a la juridicion de la prevosté d'Orliens sei et ses heirs et ses successeurs et touz ses biens muebles et non muebles presenz et a venir ou que il soient. Et renoinca quant a ces choses a toutes graces, a touz privileges de croiz prise et a prendre, a l'excepcion de tricherie, de mal, et en fet a tout error et decevance, a toute maniere de dreit de canon et de lay, a touz us, coustumes et establissemanz de pays et de leu, a toutes autres excepcions et deffensses de fet et de dreit qui poissent estre dites contre ces letres. Ce fut fet l'an de Nostre Seigneur MCCIIII^xx et unze, le lundi d'après les oictieves de la feste de la Sainte Croix en may.

N. de Boch.