Hugo, Dei gratia Aurelianensis episcopus, omnibus ad quos presentes littere pervenerint salutem in Domino. Noverint universi presentes pariter et futuri quod decimam in parochia Sancti Agili constitutam, quam nobis titulo pignoris obligavit pro quinquaginta libris parisiensibus (sic) Herveus de Porta, miles, capitulo Sancte Crucis contulimus, tali tenore quod eam recepimus admodiacionem ab eodem capitulo, quamdiu vixerimus si tantum duraverit obligatio, pro duobus modiis hybernagii et duobus avene annuatim reddendis Aurelianis nobis idem capitulum pro anniversario patris nostri faceret in quo dictos quatuor modios grani distribueret et de proprio viginti solidos apponeret. Post decessum vero nostrum si tantum duraverit obligatio, tota decima cum omni integritate ad capitulum devolvetur, et inde fiet distributio canonicis qui anniversario intererunt, et tunc remanebunt viginti solidi quos de suo apponere promiserunt. Quicumque autem memoratam decimam redimi contingerit vel in vita nostra vel post decessum nostrum, capituli erit tota redemptio ad emendos inde redditus qui anniversario distribuentur supradicto. Quod ut firmum et stabile perseveret presentem paginam sigilli nostri appensione fecimus roborari. Actum anno ab incarnatione 1201, mense martio.