Sentence arbitrale confirmant au chapitre la possession de trois arpents de terre auxquels prétendait Thomas de la Ronce, et condamnant ce dernier à 10 sous parisis d'indemnité et à se faire absoudre de l'excommunication prononcée à la requête du chapitre.
- A Original sur parchemin. Arch. dép. Loiret, G 484.
- a Cartulaire de Sainte-Croix d'Orléans (814-1300), éd. Eugène Jarry et Joseph Thillier, Paris, 1906.
Universis presentes litteras inspecturis Matheus de Magduno, presbiter, et magister Guillelmus de Bolaio, canonici Aurelianenses, salutem in Domino. Noveritis quod cum Thomas de Roncia, armiger, de contentione seu controversia que movebatur inter ipsum, ex una parte, et inter nos, ex altera, super tribus arpentis terre arabilis vel circiter que idem Thomas sine assensu et voluntate dicti capituli tradiderat ad carum censum sub annua pensione vingiti (sic) solidorum Guerino Bauguier, Laur[entio] Salome et Guilloto Nathalis, quod non poterat facere nec debebat, alte et basse in nos duos compromiserit seu compromissum fecerit per fidem suam, et voluntati sive arbitrio nostro totaliter se submiserit, et etiam de expensis, dampnis et deperditis et arreragiis nobis per ipsum illatis, de quo arbitrio ab ipso tenendo et firmiter adimplendo se constituerunt plegios pro ipso Thoma, quilibet in solidum et per fidem, Simon de Porta, armiger, gener dicti Thome, et Philippus Prepositi, civis Aurelianensis, coram venerabili viro officiali Aurelianensi, et quantum ad hoc se supposuerunt ipsi plegii jurisdictioni dicti officialis et per fidem, prout in litteris dicti officialis plenius continetur ; nos, habito bonorum virorum consilio, die certa assignata a nobis dicto Thome ad audiendum arbitrium seu voluntatem nostram, dicto Thoma presente coram nobis et arbitrium nostrum seu voluntatem nostram super dicta contentione instanter postulante, arbitrium sive voluntatem nostram protulimus in hunc modum, videlicet quod dicta tria arpenta terre, de quibus contentio fuerat inter nos et ipsum Thomam, ecclesie Aurelianensi quitta et libera remaneant imperpetuum, et quod idem Thomas vel heredes seu successores sui in dicta terra decetero nichil habeant seu petant, dictum Thomam per arbitrium nostrum condampnantes ad reddendum nobis quadraginta solidos parisiensium pro expensis factis a nobis per ipsum et occasione ipsius in lite mota inter nos et ipsum ratione contentionis predicte. Dicimus etiam per arbitrium nostrum quod idem Thomas se faciat absolvi, secundum quod sibi videbit, a sentencia excommunicacionis in ipsum lata ad instantiam nostram occasione litis mote inter nos et ipsum. In cujus rei memoriam et notitiam nos presentes litteras sigillis... 1 cum sigillo curie Aurelianensis duximus roborandas. Datum et actum apostolorum Philippi et Jacobi.
Godinus.
