Manasses, Dei gracia Aurelianensis episcopus, omnibus presentes litteras inspecturis in Domino salutem. Noverint universi quod Odo Borrellus, dominus de Cortalein, in nostra presentia constitutus, totam decimam quam in parrochia de Fontanis ad presens tenebat in dominio suo et eam quam post decessum nobilis mulieris Johanne de Exolduno, relicte defuncti Jocelini Borrelli, militis, habiturus erat in eadem parrochia, videlicet duas partes decime bladi et tres partes decime vini, et quicquid etiam tam in minuta quam alia quacumque decima tam idem Borrellus quam dicta domina in eadem habebant parrochia, dilectis filiis decano et capitulo Aurelianensibus cum tractu earumdem decimarum et cum omni jure quod in ipsis habebant, pro quingentis et quinquaginta et unaa libris parisiensium vendidit et quictavit. De qua summa se totaliter et integre tenuit coram nobis pro pagato. Hanc autem venditionem nobilis mulier Margarita, uxor ejus, et eorum filii, Odo scilicet et Johanna, voluntate spontanea coram nobis voluerunt et ratam habentes unanimiter concesserunt, prefata Margarita sub fidei date vinculo promittente, quod in premissis decimis nichil decetero nomine dotalicii seu alio quocumque modo per se vel per alium reclamabit. Supradicta etiam Johanna de Exolduno venditionem premissam ratam habens et fide media concedens quicquid juris in eisdem decimis nomine dotalicii seu quocumque alio modo habebat quittavit in perpetuum et remisit. De guarandienda itaque venditione premissarum decimarum erga supradictos decanum et capitulum plegios dictus Borrellus interposuit, videlicet Hamericum de Buiseau et Henricum de Marvilier, milites, qui per fidem interpositam promiserunt quod si qua dampna, dispendia vel expensas pro defectu guarentisie ad usus et consuetudines Aurelianenses faciende decanus et capitulum Aurelianenses incurrerent super decimis memoratis, ipsi infra quindenam postquam essent requisiti Aurelianis captionem tenerent, inde nullatenus recessuri donec de dampnis, gravaminibus et expensis esset eisdem decano et capitulo plenarie et integre satisfactum. Ad hoc prefatus Odo Borrelli in perpetuam elemosinam dedit et concessit ecclesie Aurelianensi unum hominem1 de corpore et uxorem ejus cum eorum filiis ac familiis necnon cum teneuris et possessionibus eorumdem, et insuper duo arpenta terre prout hec omnia a dilecto filio Adam Breun, Aurelianensi archidiacono, fuerunt assignata, que omnia ad prefatam ecclesiam pleno jure cum omni districtu et consuetudine ac justicia, sicut dictus Odo eadem possidebat, in perpetuum pertinebunt, in quibus idem Odo vel heredes ejus nichil juris de cetero poterunt reclamareb. Quam donationem et elemosinam supradicta Margarita, uxor ipsius Odonis, et prefati filii eorumdem coram nobis voluerunt, et ipsa Margarita fide media liberaliter approbavit. Cum igitur supradicte decime de feodo dilecti filii Garini, archidiaconi Sigalonie, moverent, idem archidiaconus prefatam venditionem sicut superius continetur coram nobis voluit et concessit. Nos itaque, de quorum feodo movebant omnia supradicta, tam donationem quam venditionem premissam ratam habuimus et liberaliter duximus approbandam, concedentes insuper Aurelianensi ecclesie, de voluntate et assensu dicti archidiaconi, omnes decimas omnium novalium tam excultorum quam excolendorum in ipsa parrochia de Fontanis in perpetuum et sine contradictione vel diminutione qualibet et absque alicujus participatione possidendas. Que omnia ut firma et inconcussa permaneant, nos in ipsorum testimonium et stabilitatem presentes litteras fieri fecimus et sigilli nostri munimine roborari. Actum anno ab incarnatione Domini MCC vicesimo, mense januario, in vigilia Epiphanie Domini.