O[do], Dei gratia Parisiensis episcopus, omnibus ad quos presens scriptum pervenerit, salutem in Domino. Cum dilectus in Christo B[ucardus] de Puteaco, consanguineus noster, quondam archidiaconus Sancte Crucis Aurelianensis, in extremis agens, nos et Radulfum Harenc extreme voluntatis sue executores constituisset, sicut ex publico instrumento ipsius manifestius apparebat, et dictus R[adulfus] domos in claustro Aurelianensi sitas et quatuor arpenta vinearum apud Vilers sita, que Bucardus tenuerat relicti titulo, [reclamaret], propter hoc una cum venerabili domino ac patre nostro Bituricensi archiepiscopo ad ecclesiam Aurelianensem accessimus. Cujus cum intrassemus capitulum et R. Harens intentionem suam sicut premissum est fundavisset, canonici responderunt nos et R. Harenc, sicut testationis littere proponebant, ad hoc executores positos testamenti, ut ipsi B. debita petere et ab eo debita solvere deberemus, et ob hoc XL libras monete Parisiensis a nobis instantius repetebant quas sepefactus B. de firma Maziaci Sancte Crucis capitulo, interposita jurisjurandi religione, solvere tenebatur, sicut in ejus autentico comparebat. Asserebant etiam se Radulfo debere preferri, quia, sicut cavetur in jure, creditores legatariis preferuntur, addentes quod venerabilis consanguineus noster H[ugo], quondam Dunelmensis episcopus, per eandem ecclesiam transitum faciens, eis ad festum beati Cuberti imperpetuum honorifice celebrandum et ad suum anniversarium faciendum LXXX marcas argenti firmiter promisisset, quarum se B[ucardus] pro patruo suo principalem constituit in capitulo debitorem, sicut plurimi testes et omni exceptione majores coram Domino Bituricensi et nobis, juramentis prestitis, probaverunt. E diverso, vir nobilis comes Barri1, de Puteaco dominus, dicti B[ucardi] nepos, domos easdem et vineas vendicabat, ad se eas jure hereditario devolutas proponens, contra quem capitulum Sancte Crucis suprafatis exceptionibus utebatur. Post morosas igitur concertationes et varias, ne Radulfus Harens actoris et judicis vicem tenere et gerere videretur, tam ipse quam comes quam ipsum capitulum in nos solos super hoc firmiter compromiserunt, factam compromissionem christiane fidei religione et legitima pene adjectione vallantes. Nos ergo, bonorum virorum assertionibus et idoneis depositionibus sufficienter instructi, de consilio venerabilium personarum domini Bituricensis et domini Aurelianensis et aliorum prudentium, C marcas ab ipso B[ucardo] Sancte Crucis deberi capitulo fuimus arbitrati, et cum eis aliunde satisfacere non possemus, domos eis et vineas dedimus atque assignavimus in solutum ita quod si Radulfo vel comiti domos et vineas redimere forte placuerit, de C marcis a capitulo redimant, infra annum et diem redemptionis ipsius tempora concludentes. Porro decanus et capitulum Sancte Crucis, ad preces domini Bituricensis et nostras, domos sepefatas et vineas domino I[voni], Sancte Crucis cantori, sub annua pensione XI sol[idorum] anno quolibet Sancte Crucis capitulo solvendarum quoad vixerit concesserunt, quarum medietas in anniversario Dunelmensis episcopi, reliqua in anniversario dicti B[ucardi] canonicis qui interfuerint dividetur. Cujus rei series ut firmior habeatur eam litterarum et sigilli nostri testimonio communimus. Actum anno incarnati Verbi MCXC septimo, pontificatus nostri anno primo.