M[anasses], Dei gratia Aurelianensis episcopus, omnibus presentes litteras inspecturis salutem in Domino. Noverit universitas vestra quod cum Herbertus de Vitriaco bone memorie, Aurelianensis ecclesie quondam nutricius, ob remedium anime Benedicti quondam avunculi sui, et sue, necnon et parentum suorum, ad eorum et suum anniversarium annis singulis recolendum, duos solidos census cum decima in vineis apud Combleium, et domos suas sitas in claustro Sancte Crucis, et insuper septem quarteria vinearum apud Boel ultra Ligerim, partim in censiva Beati Evurcii, partim in censiva Hugonis de Rua Nova militis constituta, Aurelianensi ecclesie in perpetuum contulisset, ad preces ipsius Herberti Aurelianense capitulum hec omnia magistro Gaufrido, nepoti suo, contulit et concessit quoad viveret possidenda. Verum quia idem Gaufridus, ad preces pie recordationis Hugonis quondam Aurelianensis episcopi, predecessoris nostri, dictum censum cum decima et taxatas domos Aurelianensi ecclesie cesserat, metuens Aurelianense capitulum a parentibus dicti Gaufredi, si ipsum seisitum de memoratis vineis in suo obitu invenirent, sibi fieri prejudicium aut gravamen, pro predictis septem quarteriis septem quarteria apud Bullum in clauso sita dicti capituli commutavit et concessit a censu et decima et omni alia exactione immunia, salvo tamen eidem capitulo jure proprietatis ipsius Gaufridi perpetuo obtinenda, ita videlicet quod, si idem Gaufridus vineis illis falce et ligone prius excultis ferte decesserit, de fructibus ejusdem anni suam sine contradictione aliqua faciat voluntatem, et post ipsius obitum, ad pretaxatum capitulum in hunc modum libere revertantur. Ne hoc igitur cujuspiam calumpniante malicia rescindatur, in testimonium et munimen presentes litteras ad petitionem partium sigilli nostri caractere fecimus consignari. Actum anno Domini Mº CCº sexto decimo.