Magister Johannes dictus Pullus, clericus domini Regis, et Adam Panetarius, baillivus Stampensis, universis presentes litteras inspecturis in Domino salutem. Notum facimus quod cum karissimus dominus noster Ludovicus, rex Francorum illustris, occasione enormis forisfacti quod super occisione clericorum facta Aurelianis Hugoni Buticulario, militi, imponebatur, per dictum suum et ordinationem suam retinuit de terra ejusdem Hugonis Buticularii, militis, duodecim libratas annui redditus, ad opus cujusdam capellanie Aurelianis faciende pro animabus ipsorum clericorum occisorum et aliorum fidelium, nos, de voluntate et speciali mandato ejusdem domini regis, quadraginta et octo arpenta terre, uno quarterio minus, sita apud Luères, inter Sanctum Germanum et fortericiam de Lueriis, juxta Haias, pro dictis duodecim libratis annui redditus ad opus prefate capellanie assignavimus et tradidimus capitulo Aurelianensi, in quadam pecia continua, sicut, nobis presentibus, mensurata fuerunt et metata. Hanc autem assignationem et traditionem factam capitulo memorato voluit et concessit idem Hugo Buticularius coram nobis, promittens fide prestita corporali quod in prefatis quadraginta et octo arpentis terre nichil per se vel per alium decetero reclamabit. Hanc etiam assignationem et traditionem Willelmus Buticularius, miles, a quo dictus Hugo dictam terram, nullo intermedio, tenebat in feodum, coram nobis concessit, voluit et laudavit. Karissima etiam domina Isenburgis, Francorum regina illustris, a qua idem Willelmus feodum dicte terre, ratione dotalicii sui, immediate tenebat, prenominatam assignationem et traditionem concessit, voluit et laudavit. Eustachia etiam, uxor dicti Hugonis Buticularii, sepedictam assignationem et traditionem voluit et concessit, fide prestita corporali promittens quod ratione dotalicii vel alia quacumque ratione nichil decetero in dicta terra per se vel per alium reclamabit. Actum Aurelianis anno Domini MCC tricesimo sexto, mense decembri.