Thescelinus, officialis curie Aurelianensis, omnibus presentes litteras inspecturis salutem in Domino. Noverit universitas vestra quod, R[oberto] de Marcel[liaco] canonico Aurelianensi pro capitulo Aurelianensi, et Gaufrido Borrelli, clerico de Bullo, pro se coram nobis in jure constitutis, idem Gaufridus recognovit quod compositionem, quam homines qui vineas habent in parocchia de Marzeio fecerant cum capitulo Aurelianensi super decimis earumdem vinearum, nec approbaverat nec approbabat, nec dictam compositionem volebat aliquatenus observare ; dictus autem Gaufridus de quolibet modio vini quod cetero habiturus erat in parocchia de Marzeio, in tribus quarteriis vinearum sitis in loco qui dicitur Rondeau in decimatione prefati capituli se, unam lagenam annis singulis soluturum repromisit. In cujus rei testimonium presentes litteras confici et presentis sigilli fecimus munimine roborari. Actum anno Domini MCC vicesimo, mense novembri.