A. decanus, Symon et Milo, canonici Meldenses, omnibus presentes litteras inspecturis salutem in Domino. Noverit universitas vestra quod cum inter viros venerabiles L[ebertum] decanum et capitulum Aurelianense, ex una parte, et homines de parrochia de Marzeio, ex alia, super decimis vinearum quas dicti homines habent in parrochia de Marzeio in decimatione prefati capituli, coram nobis auctoritate apostolica contencio verteretur, ab eodem capitulo et predictis hominibus, sicut ex parte ipsorum nobis est intimatum, in virum venerabilem abbatem Curie Dei et unum de capitulo Aurelianensi, quem capitulum eligere maluerit, est de dictis decimis, fide ex parte dictorum hominum corporaliter prestita, compromissum, ita videlicet quod dicti arbitri statuere tenebuntur ut de omnibus vineis de parrochia de Marzeio, in decimatione Sancte Crucis sitis, pro quolibet arpento tres lagene vini vel duodecim denarii, sicut eisdem arbitris melius placuerit, nomine decime annis singulis in perpetuum Aurelianensi capitulo persolvantur ; et quia pro dictis decimis sibi minus sufficienter a sepedictis hominibus et eorum antecessoribus persolutis prefatum capitulum multis retro temporibus dampna non modica sustinuit, et pro eisdem decimis placitando multas fecit expensas, sepefati homines quandam summam pecunie secundum voluntatem et beneplacitum dictorum arbitrorum taxandam prenominato capitulo solvere tenebuntur. Quod si predicti idem arbitri super predictis concordare non poterunt, ipsi aliquem tercium eligent ut quod duobus ex ipsis placuerit observetur. Si autem in eligendo tertium sunt discordes, secundum voluntatem viri venerabilis L[eberti], decani Aurelianensis, ipsis tertius adjungetur. Nos autem, ad instanciam et peticionem tam prefati capituli quam dictorum hominum, predictam compromissionem approbamus et confirmamus, reservata nobis nichilominus potestate animadvertendi tam in dictum capitulum quam in sepefatos homines si ipsi forte a predicta composicione resilirent. In cujus rei testimonium presentem paginam confici et sigillorum nostrorum munimine fecimus roborari. Actum anno Domini MCC octavo decimo, mense novembri, sabbato post festum sancti Martini.