Gaufridus, archidiaconus Castridunensis, omnibus presentes literas inspecturis salutem in Domino. Constituta in nostra presencia nobilis mulier Johanna, relicta defuncti Garnerii de Langi, militis, venditionem totius decime in parrochia de Fontanis constitute, ad dominium Odonis Borrelli, militis, fratris ejusdem domine, pertinentis, videlicet duas partes decime bladi et tres partes decime vini et quidquid etiam in minuta vel alia quacumque decima in parrochia predicta idem O[do] habebat, quam venditionem prefatus Odo fecit viris venerabilibus decano et capitulo Aurelianensibus sicut ipse coram nobis confessus est viva voce, ipsa inquam domina voluit, ratam habuit et fide media approbando concessit, promittens sub fidei date vinculo quod contra eamdem venditionem per se vel per alium de cetero non veniret. Item cum prefatus Odo in elemosinam dederit et in perpetuum concesserit ecclesie Aurelianensi unum hominem de corpore et uxorem ejus cum eorum filiis et familiis, necnon cum teneuris et possessionibus eorumdem, ad consilium venerabilis viri Ade Breon, Aurelianensis archidiaconi, assignandos, et preterea duo arpenta terre cum rebus premissis ad opus ecclesie Aurelianensis, que omnia ad prefatam ecclesiam pleno jure cum omni districtu et consuetudine ac justicia, sicut dictus Odo eadem possidebat, in perpetuum pertinebunt, prenominata domina elemosinam de rebus omnibus premissis factam coram nobis fide media volens et concedens liberaliter et libenter approbavit. In cujus rei memoriam et testimonium presentes litteras tam ad ipsius Johanne quam dicti Odonis Borrelli peticionem fieri fecimus et sigilli nostri munimine roborari. Actum anno Domini millesimo ducentesimo vicesimo, mense januario.